ಮತ್ತದೇ ಹೊತ್ತಿತು

wordpress

ನನ್ನ ಯೌವನ ಕಳಚಿ
ವರುಷಗಳೇ ಉರುಳಿದವು
ಮರೆವಿನಾಸರೆ ಪಡೆದು
ತೊರೆದೆನವಳ ನಿರಾಳ
ಈಜಿ ಇಹಸುಖದಾಚೆ ಉಸಿರ ಪಡೆದೆ

ಹಿಡಿದ ಲೇಖನಿ ತೊಡೆದು
ಮಸಿಯಾಚೆ ಚೆಲ್ಲಿದೆ
ಬರೆವ ಆಸೆಯ ಸರಿಸಿ
ಪ್ರೇಮದೊರತೆ ಬತ್ತಿಸಿದೆ
ಪ್ರಜ್ಞತೆಯ ದಾರಿಯಲಿ ವ್ಯಸ್ತನಾದೆ!

ವಿಮುಖದ ಗುರಿಹಿಡಿದು
ದೃಢಮನದ ಗಡಿಯಾದೆ
ಪ್ರೇಮಿರೂಪವ ಕಳಚಿ
ಪ್ರಬುದ್ಧರೂಪವ ಪಡೆದೆ
ಆಸೆತೊರೆವಾತುರದ ಗ್ರಸ್ತನಾದೆ!

ಭ್ರಾಂತಮನ ತೊಲಗಿಸಿದೆ
ಶಾಂತ ಸಾಗರವಾದೆ!
ಬರೆವ ಹಂಬಲ ಮರಳಿ
ಲೇಖನಿಗೆ ಹಾತೊರೆದೆ
ದಾಖಲಿಸೆ ಪುಟಗಳಲಿ ಜೀವನ ರಸರಮ್ಯ

ಬಿಡದೆ ಬರೆದೇ ಭರದೆ
ಒಳಹೊರಗ ಮರೆತೆ
ದಿನಮಾನಗಳುರುಳಿದವು
ಹೊಸೆದೆ ಹೊತ್ತಿಸಿದೆ ದಿವ್ಯ
ಮರಳಿ ಅರಳಿದವೇ ಪರಿಮಳ ಪ್ರೇಮಕಾವ್ಯ!

– ಅನಂತ ರಮೇಶ್

(Published in Kannada.Pratilipi e magazine: Link: https://kannada.pratilipi.com/story/%E0%B2%AE%E0%B2%A4%E0%B3%8D%E0%B2%A4%E0%B2%A6%E0%B3%87-%E0%B2%B9%E0%B3%8A%E0%B2%A4%E0%B3%8D%E0%B2%A4%E0%B2%BF%E0%B2%A6%E0%B3%86-BIWXHGqBozaE)

Advertisements

ತಿಳಿ

bird

ಓದು
ಬಿಡದೆ ಓದು
ಅರಿ
ಬೆರೆತು ಅರಿ
ತಿಳಿ
ಹೆಚ್ಚು ತಿಳಿ
ತಿಳಿಯುತ್ತಾ
ಒಳ ಕೊಳೆ ಕೊಚ್ಚೆ ಕೆಸರು
ದು:ಖ ದುಮ್ಮಾನ ವ್ಯಸನ


ಮುಟ್ಟಿ ಉಳಿವ ತಿಳಿ
ಸ್ವಚ್ಛ
ಜಲದಂತೆ
ಜ್ಞಾನ
ತಿಳಿ

(ಚಿತ್ರ:ಅಂತರ್ಜಾಲ ಕೃಪೆ)

ಅದ್ಭುತ ವಾಕ್ಯ

forgetting.png

ವಾಯು ವಿಹಾರ ಹೊರಟೆ
ರಸ್ತೆಯಲ್ಲಿ ಕವಿಸಮಯ ಹಾಜರು
ಅದ್ಭುತ ವಾಕ್ಯ ಹೊಳೆಯಿತೊಂದು
ನನ್ನ ಕವನದ ಚರಣವಿದೇ
ತೀರ್ಮಾನವಾಯಿತು

ಬಂದೆ ಮನೆಗೆ
ತೆರೆದೆ ಹಾಳೆ
ಪೆನ್ನು ಬೆರಳಿಗೆ
ಮತ್ತು ತಲೆಯಲ್ಲಿ ತಿಣುತಿಣುಕೆ…
ಒಂದೂ ಅಕ್ಷರ ಮೂಡಲಿಲ್ಲ
………………………………..
ಬೆಳಿಗಿನ ವಿಹಾರ ವಾಕ್ಯ
ಅದ್ಭುತವಿದ್ದರೆ ಮರೆಯುತ್ತಿರಲಿಲ್ಲ!