ಅಳಿವಿಲ್ಲ

flower

ಯಾವುದನ್ನೂ ಬಹಳ ಕಾಲ
ಇಟ್ಟುಕೊಳ್ಳಲಾಗುವುದಿಲ್ಲ
ಇಂಗಿಹೋಗುತ್ತದೆ
ಒಣಗಿಹೋಗುತ್ತದೆ
ಕೊಳೆಯುತ್ತದೆ
ದುರ್ಗಂಧ ಹರಡುತ್ತದೆ
ಬೇಡವಾಗುತ್ತ ಅರುಹುತ್ತದೆ
ನಶ್ವರದ ಶಾಶ್ವತ ಸತ್ಯ

ಆದರೆ….
ಅಂದು
ನನ್ನ ಹದಿಹರಯದಲ್ಲಿ
ಹೃದಯ ತುಂಬಿದವಳು
ಹರವಿ ಹಾಡಾದವಳು
ಇಂದಿಗೂ…
ಅದೇ ಹಸಿರು ಬನಿ ಬಳುಕು
ಸುಕುಮಾರ ಅರಳು ಗಂಧ
ಮೊದಲ ನೋಟ ಮೀಟಿದ
ಪ್ರೇಮ ಭಾವ ಬಂಧ
ಅಳಿವಿನಾಚೆಗೂ ಉಳಿವ
ಸದಮಲ ಸತ್ಯ… ಅಭೇದ

(Picture courtesy: Pixabay)

Advertisements

ಬುದ್ಧ ಕೃಷಿ

buddha

ಅರಮನೆಯ ಅಂಗಳದವನು
ಕೆಸರ ಹೊಲಕ್ಕೆ ಕಾಲಿಡುವನೆ!
ನಳನಳಿಸುವ ಕಳೆಯ ಕಿತ್ತು
ಪೈರುಗಳಾರೈಕೆ ಮಾಡುವನೆ!
ಬೆಳೆದ ಬೆಳೆಯ ಚೈತನ್ಯ ಹೀರುವನೆ!

ಆದರಿವನೋ…
ಅಮೃತ ಮಹಲಿನಿಂದ ನಿವೃತ್ತಿಗೊಂಡು
ತನ್ನೊಳಗ ಹೊಲದಲ್ಲೆ ಕೃಷಿಮಾಡಿದವನು?!

ಹೆಪ್ಪುಗಟ್ಟಿದ್ದ ನಂಬಿಕೆಗಳ
ದ್ರವಿಸಿ ದೂರಿಸಿ
ಮೌಢ್ಯ ಕಳೆಗಳ ಬೇರ ಕಳಚಿ
ಕಳೆತು ರೈತನಾದವನು!

ಚಿತ್ತಕ್ಕೆ ಚಿಂತನೆಯ ನೀರ
ನಿರಂತರ ಹನಿಸಿ
ಬಿಸಿಯುಣಿಸಿ ನಿಷ್ಠುರ ಸತ್ಯ
ಬೆಳೆವ ಕೃಷಿಕನಾದವನು

ಬೆಳೆದ ಚಿಂತನೆಯ ಬೆಳೆಯ
ಬಳಿ ಬಂದವರ ಹೊಲಗಳಿಗೆರಚಿ
ವಿಸ್ತರದ ಬಿತ್ತನೆಗೆ ತೊಡಗಿದವನು

ಬೆಳೆದವರು ಬೆಸೆದು
ದೆಸೆದೆಸೆಗೂ ಬುದ್ಧನುಡಿ
ಬೀಜಗಳ ಹರಡಿದರು

ಕಳೆ ಬೆಳೆಯುವುದು ನಿಂತಿಲ್ಲ
ಬುದ್ಧ ಕೃಷಿಯೂ ನಿಲ್ಲದು

buddh

(Pic courtesy: Pixabay)

ಬೆಂಬಿಡೆನೆ ಕವಿತಾ…

pixabay

ಏನು ಏನಿದು ಸೆಳೆತ
ಎತ್ತಕಡೆಗೀ ಎಳೆತ
ಕಾವ್ಯವೇ ನನ್ನ ಮೊರೆತ ?!

ಸೊಂಪಿನಲೆ ಹರಿವ ಸುಧೆ
ಸೆಳೆವ ಸೆಲೆ ಸಂಪದೆ
ಮೃದುಲವುಲಿತ ಮಿತ
ಸ್ಮಿತೆ ಅಕ್ಷರೆ ಅಯಸ್ಕಾಂತೆ
ಇದೊ ಇಲ್ಲಿ ಇನಿತೆ ಸನಿಹದಲ್ಲಿ!

ಸಣ್ಣ ತೊರೆಯಂತೆ
ಕಣ್ಬೆಳಕಿನಂತೆ
ಎದೆಗೆ ಹಚ್ಚಿ ಹಣತೆ
ತೋರಿ ತೋರದೆಲೆ
ಮನಸಿನೊಳಬಿದ್ದ ಸೋನೆ
ಹದ ಮಿದುವಲ್ಲಿ
ಚಿಗುರಲಿರುವ ಲಲನೆ

ಬಳುಕಿನ ನುಡಿಗಳಲಿ
ನವಿರ ಬಕುಳ ಸ್ಪರ್ಷ
ಪದ ಪದಗಳ ಲಾಲಿತ್ಯ
ಉದ್ವೇಗರಹಿತ ಬಡಿತ
ಸೂಕ್ಷ್ಮ ಸುಳಿವ ಪರಿಚಿತೆಯ
ಹಿಂಬಾಲಿಸುವ ತವಕ ಸತತ!

ತಿರುಗೆನ್ನ ನೋಡಿ
ಮುಗುಳನ್ನು ತೂರಿ
ಮನಸೆಲ್ಲ ಮೊಗೆದು
ಕರಗಳಲ್ಲಿ ಚಿಗುರಿ
ಅರಳಿ ಪರಿಮಳವಾಗಿ
ನಲಿದು ನೃತ್ಯವಾಗಿ
ರಾಗ ಹರಿಸಲಿಹಳೆ!?

ಬೆನ್ನಬಿಡದೆ ತಡೆದೆ
ಅಕ್ಷರಗಳೆ ಒಲಿಯೆ ಎಂದೆ…
ಗುರುಲಘುಪ್ರಾಸಗಳಿಗೆ
ತೆರೆದು ಕಂಗಳ ತೆರೆ
ಧ್ಯಾನದಲಿ ಸೆಳೆದೆ
ಬರಹಕ್ಕೆ ಇಳಿದೆ

ದಾಹ ತೀರುವ ಘಳಿಗೆ
ಚೈತನ್ಯ ಮೊಳಗೆ
ಬೆರಳುಗಳಲ್ಲಿ ಹರಿದು
ಪದ ಪದಗಳ ಹೊಕ್ಕು
ಕನವರಿಸಿದ ಕವನ
ದೇಹ ಧರಿಸಿ ನಕ್ಕಳು!

ಬೆಂಬಿಡದವನಿಗೆ
ಸಿಕ್ಕಿತಿದೊ ಸಾರ್ಥಕತೆ
ದಕ್ಕಿತಿದೊ ಗಮ್ಯತೆ!
ತಬ್ಬಿತಿದೋ…..
ಹಬ್ಬಿತೀಗ ಕವಿತೆ!!

(picture courtesy:Pixabay)

ಬಿಡು ಮೌನ

Bidumouna

ನೀ ಸನಿಹವಿರದಿರೆ ನಲ್ಲೆ
ವಿರಹ ಹೆಣೆಯದಿರದೇ ಬಲೆ ?

ನಿನ್ನ ಮಾತುಗಳಿಲ್ಲ
ನಗೆಯ ನೇಯ್ಗೆಗಳಿಲ್ಲ
ನೋಟದೊಸಗೆಗಳಿಲ್ಲ
ನಲಿವ ನಡಿಗೆಗಳಿಲ್ಲ!

ಹೃದಯ ಬಡಿತಗಳಲ್ಲಿ
ಜೀವ ಸಂಚರವಿಲ್ಲ
ಚೇತನದ ರೂಪಿನೀ
ಮುನಿಸು ಮೌನವು ಸಲ್ಲ

ನಿನ್ನುಸಿರ ಬಿಸಿಯಿತ್ತ
ಗಾಯ ಮಾಯುತಲಿಲ್ಲ!
ಹರಿಸಿ ತಂಪಿನ ಸಲಿಲ
ಸುಳಿಯಾದೆ ಮನದಾಳ !

ಹಸಿ ನೆನಪುಗಳ ಒಟ್ಟಿ
ಸುಡುವ ಕಠುರತೆಯಲ್ಲಿ
ನಿನ್ನ ಕಾಯದ ಮಳೆಗೆ
ನಿರುತ ಆಸೆಯಾದೆನಲ್ಲ

ಎಲ್ಲಿ ಹುಡುಕಲಿ ತನುವ
ಎಂದು ಕೇಳಲಿ ವಚನ?
ಕಾಣಬಲ್ಲೆನೆ ಚಂದಿರೆಯ
ಮಧು ನಗೆಯ ಸಿಂಚನ?

ಎಂಥ ನೆಲವೆ ನೀನು ಹಸಿರ
ಮೂಲದ ತಂಪು ಝರಿಯೆ!
ಮಧುರ ಫ಼ಲವೇ ಮೆಲ್ಲೆ
ಸಿಹಿ ಭಾವ ಭರಿತ ತೆನೆಯೆ!

ಕೋಪ ಶೀತಲ ಶಿಲೆಯ
ಮಾತಿನುಳಿಯಲಿ ತೀಡು!
ಪ್ರೇಮ ಮೂರುತಿ ಕಡೆದು
ಎದೆಯ ಮಂದಿರ ಮಾಡು!

ನೀ ಸನಿಹವಾದರೆ ನಲ್ಲೆ
ವಿರಹ ನೆನೆ ಸಿಹಿ ಕಬ್ಬ ಜಲ್ಲೆ!

– ಅನಂತ ರಮೇಶ್

(ಚಿತ್ರ: Pixabay)

(Published in kannada.pratiipi. Link address: https://kannada.pratilipi.com/story/%E0%B2%AC%E0%B2%BF%E0%B2%A1%E0%B3%81-%E0%B2%AE%E0%B3%8C%E0%B2%A8-ZxEPzymoF6IA)

ಮತ್ತದೇ ಹೊತ್ತಿತು

wordpress

ನನ್ನ ಯೌವನ ಕಳಚಿ
ವರುಷಗಳೇ ಉರುಳಿದವು
ಮರೆವಿನಾಸರೆ ಪಡೆದು
ತೊರೆದೆನವಳ ನಿರಾಳ
ಈಜಿ ಇಹಸುಖದಾಚೆ ಉಸಿರ ಪಡೆದೆ

ಹಿಡಿದ ಲೇಖನಿ ತೊಡೆದು
ಮಸಿಯಾಚೆ ಚೆಲ್ಲಿದೆ
ಬರೆವ ಆಸೆಯ ಸರಿಸಿ
ಪ್ರೇಮದೊರತೆ ಬತ್ತಿಸಿದೆ
ಪ್ರಜ್ಞತೆಯ ದಾರಿಯಲಿ ವ್ಯಸ್ತನಾದೆ!

ವಿಮುಖದ ಗುರಿಹಿಡಿದು
ದೃಢಮನದ ಗಡಿಯಾದೆ
ಪ್ರೇಮಿರೂಪವ ಕಳಚಿ
ಪ್ರಬುದ್ಧರೂಪವ ಪಡೆದೆ
ಆಸೆತೊರೆವಾತುರದ ಗ್ರಸ್ತನಾದೆ!

ಭ್ರಾಂತಮನ ತೊಲಗಿಸಿದೆ
ಶಾಂತ ಸಾಗರವಾದೆ!
ಬರೆವ ಹಂಬಲ ಮರಳಿ
ಲೇಖನಿಗೆ ಹಾತೊರೆದೆ
ದಾಖಲಿಸೆ ಪುಟಗಳಲಿ ಜೀವನ ರಸರಮ್ಯ

ಬಿಡದೆ ಬರೆದೇ ಭರದೆ
ಒಳಹೊರಗ ಮರೆತೆ
ದಿನಮಾನಗಳುರುಳಿದವು
ಹೊಸೆದೆ ಹೊತ್ತಿಸಿದೆ ದಿವ್ಯ
ಮರಳಿ ಅರಳಿದವೇ ಪರಿಮಳ ಪ್ರೇಮಕಾವ್ಯ!

– ಅನಂತ ರಮೇಶ್

(Published in Kannada.Pratilipi e magazine: Link: https://kannada.pratilipi.com/story/%E0%B2%AE%E0%B2%A4%E0%B3%8D%E0%B2%A4%E0%B2%A6%E0%B3%87-%E0%B2%B9%E0%B3%8A%E0%B2%A4%E0%B3%8D%E0%B2%A4%E0%B2%BF%E0%B2%A6%E0%B3%86-BIWXHGqBozaE)

ಆಸೆ

fall

ಅಂಬಿಗರ ಚೌಡಯ್ಯ ನುಡಿ ವಚನ

“ಆಶೆಯುಳ್ಳಾತನೊಬ್ಬರಾಧೀನದಲ್ಲಿಪ್ಪ”

 

ಆಸೆ ಮನಸ್ಸಾವರಿಸಿತು

ಅಧ:ಪತನಕ್ಕೆ ಹೆಜ್ಜೆ ಊರಿಸಿತು

ಗುಲಾಮೀತನಕ್ಕಂಟಿಸಿತು,

ಶಿಷ್ಟಾಚಾರದ ಕೈಹೊಸಕುತ್ತ

ದುಷ್ಟವಿಚಾರ ಅಂಕುರಿಸಿ

ಲೋಲುಪತೆ ಲಾಲಿಸಿತು

ಕಳೆಯದ ಕಳವಳವೆ ಮಾಯೆ

ಆಸೆಯೊಳು ಹುದುಗಿದೆ

ಪರಾಧೀನ ಛಾಯೆ!

 

(Picture courtesy- pixabay)

ನಾಳೆ

earth

ಅಗೋಚರವೂ
ಅದೃಶ್ಯದಲ್ಲಿರುವುದೂ
ಅಸದೃಶವೂ ಆದ ಅದು
ಆಸೆಬೀಜಗಳಾಗರ

ಅಸ್ಪಷ್ಟಕ್ಕೆಳೆವ ಜಿಗಿತ
ಭಯದ ಬೀಡು
ನಿತ್ಯವೂ ಸುಳಿವ ಗೀಳು
ಕವಿ ಎಂದೂ ಮುಗಿಸದ
ಮಹಾಕಾವ್ಯ!

ಅವಿತ ಅದ್ಭುತ
ಕಿನ್ನರ ಲೋಕ
ವಿರಹಿಗೆ ನಿಲುಕದ ದೂರ

ಹಾರಾಡಿ ಹುಡುಕು ಬೇಟೆ
ಈಜಾಡಿ ಹೆಕ್ಕಬೇಕಿರುವ ಮುತ್ತು
ಅಭದ್ರತೆಯ ತೆರೆ ನೀರ್ಗುಳ್ಳೆ

ಬಂದೀತೋ ಬಾರದೊ
ಊಹೆಗರಳುವ ಬೆಳಕು
ಇಂದು ಮುಗಿದರೆ
ಹುಟ್ಟಿಗೆ ರಹದಾರಿ
ಇಂದಿಟ್ಟ ಹೆಸರು
ಹುಟ್ಟುತ್ತಲೆ ಮರುನಾಮಕರಣ

ಕರ್ಮ
ಕಾಯಲೇ ಬೇಕು
ಸೂರ್ಯ ನಡಿಗೆಗೆ ಅದರ ತಳಕು
ಕತ್ತಲ ಕಾಡು ಕಾಣದ ಅದು
ಯಾರ ನೆಂಟ
ದೇಹ ಮನಸು ಯಾ ಮಾಯೆಗ?

(ಅಮೆರಿಕದ ಬಂಧು
ಭಾರತದ ನನ್ನೊಡನೆ ಮಾತು
ಅವನಿಗದು ನಾಳೆಗೆ ಸಂದುವ ನಾನು!)

ಲೆಕ್ಕ ಸಿಕ್ಕುವ ಇಂದು ನಿನ್ನೆ
ನಿಲುಕದ ಅನಂತ ’ನಾಳೆ’
ಹೊಳೆವಷ್ಟರಲೆ ಒಳಗೆ
ಹರಿದು ಹೋಗುವ ಹೊಳೆ!

(ಚಿತ್ರ: ಅಂತರ್ಜಾಲದಿಂದ)