ವ್ಯರ್ಥವಾಗೆನು

ಹಸಿರೆಲೆಗಳ ಹೊದಿಕೆಮಾಡಿ
ಉಸಿರ ಗಾಳಿ ಸಂಗ ಮಾಡಿ
ಸುಖದಿ ತೂಗಿ ಮೈಯ ಹರಡಿ
ಮಲೆತ ಸೆಳೆತಗಳೇನಾದವು?

ಹಕ್ಕಿ ಹುಳು ಹುಪ್ಪಟ
ಸಂಗ ಬಯಸಿ ಆಶ್ರಯ
ಪಡೆದ ಇಬ್ಬಗೆ ಸಾರ್ಥಕ
ಮೆರೆದ ದಿನಗಳೇನಾದವು?

ಬೇರು ತಪ್ಪಿ ಕಪ್ಪಾದೆನೆಂದು
ಸಾವು ರೆಂಬೆಗಳನಪ್ಪಿತೆಂದು
ಹಸಿರು ಹೆದರಿ ಹೋಯಿತೆಂದು
ತೊರೆದುಬಿಟ್ಟರೆ ಎಲ್ಲರಿಂದು?

ಆಗಬಾರದು ಹುಟ್ಟು ವ್ಯರ್ಥ
ಮನುಜನಿದ್ದಾನೆ ನೀಡೆ ಅರ್ಥ!
ತರಲಿ ಗರಗಸ ಕೊಡಲಿಯನ್ನು
ತರಿದು ಬುಡ ಛಿದ್ರಗೊಳ್ಳಲಿನ್ನು!

ನನ್ನ ಎಲ್ಲ ಅಂಗಾಂಗವೂ
ಮನುಜನ ಉಪಕರಣವಾಗಲಿ
ಉಳಿದವೆಲ್ಲವು ಉರುವಲಾಗಲಿ
ನನ್ನಿರುವು ಉಸಿರಜೊತೆಯಲಿ ಸಾಗಲಿ

(Pic courtesy:Pixabay)

ಗಣೇಶ ವಂದನೆ

ನಿರ್ಮಲ ಕೊಳದಲ್ಲಿ
ತಾವರೆ ಚೆಲುವಂತೆ
ಮನೆಯೊಳಗೆ ಸುಂದರ ಗಣಪ

ನೀಲ ನಭದಲ್ಲಿ
ತಾರೆಯು ಹೊಳೆವಂತೆ
ನಗೆ ಚೆಲ್ಲಿ ಮಿನುಗುತ ಬೆನಕ

ವೀಣೆ ನಾದದಂತೆ
ಮುರಳಿ ಗಾನದಂತೆ
ಸುಸ್ವರದಂತಿರುವ ಗಣಪ

ಚವುತಿಯ ದಿನದಲ್ಲಿ
ಭಕ್ತರ ಮನೆಯೊಳು
ಮೋದಕ ಸಿಹಿಯಂತೆ ಬೆನಕ

ಕತ್ತಲೆ ಕಳೆಯಲು
ಬೆಳಕಿನ ರವಿಯಂತೆ
ಮಣ್ಣಿನಲಿ ಹೊಮ್ಮುವ ಗಣಪ

ಬೇಡಿದರೆ ನೀಡುವ
ಹಾಡಿದರೆ ಒಲಿಯುವ
ಕಾರುಣ್ಯ ದೇವ ಕರಿಮುಖ

ವಂದನೆ ಉದ್ದಂಡ
ವಂದನೆ ಹೇರಂಬ
ವಂದನೆ ವಿಘ್ನ ನಿವಾರಕ

ತಂದೆಯಂತೆ ಬಂದು
ಬಂಧನವ ಕಳೆಯೊ
ಮಂಗಳ ಮೂರುತಿ ಗಣಪ

ಅಷ್ಟಮಿಯ ದಿನ

ಶಿಶುವೆನಿಸಿದೆ
ಸೆರೆಮನೆಯ ಹರಿದು
ಭರವಸೆಯ ಆಸೆ ಬೆಳಗಿದೆ

ತಿಳಿಗೊಳದೆ
ವಿಷಸುರಿವ ಸರ್ಪದ
ಘನ ಶಿರವ ಮರ್ದಿಸಿದೆ

ಅರಸುತನದೆ
ದುರುಳತನ ಮೆರೆದ
ಮಾವನನೆ ಹರಣವಾಗಿಸಿದೆ

ಮುರಳಿ ಗಾನದೆ
ಪ್ರೇಮಸುಧೆ ಹರಿಸಿ
ತರಳೆಯರ ಮನ ಅಪಹರಿಸಿದೆ

ಗೋವುಗಳ ಹಿಂಡ
ನಡುವೆ ನಲಿದು
ಭೂಪಾಲರ ದಂಡ ಮಣಿಸಿದೆ

ಗೀತೆ ಅರುಹಿದೆ
ಕರ್ಮ ನೀತಿ ಸಾರಿದೆ
ಧರ್ಮದ ದಾರಿಯ ತೋರಿದೆ

ಅಷ್ಟಮಿಗೆ ಬರುವ
ಇಷ್ಟ ದೇವನೆ ಕೃಷ್ಣ
ಕೃಪಾಕರ ದೇವದೇವನೆ ವಂದನೆ

ಪೇಪರೋದು

ನಲ್ವತ್ತರಲ್ಲಿ ಬಂದ ಚಾಳೀಸು
ಅರವತ್ತು ಮುಗಿದರೂ ತೊರೆಯದು
ಮುವ್ವತ್ತರಲ್ಲಿ ಬಂದ ಮಡದಿ
ಮುಖ ಮುರಿದು ಕಾಲವಾಯಿತು!

ಹೊಸದರಲ್ಲಿ ದಿನಕ್ಕೆ ಹತ್ತು
ಬಾರಿ ನವಿರು ಬಟ್ಟೆ ಹಿಡಿದು
ಕನ್ನಡಕದ ಗಾಜು ಒರೆಸಿ
ಓರೆ ಹಿಡಿದು; ಜಿಡ್ಡು ಅಳಿಸಿ
ಫಳಫಳ ಹೊಳೆಸಿ
ಎರಡೂ ಕಿವಿಗಂಟಿಸಿ
ಬೆಳಗಿನೋದಿಗೆ ಪತ್ರಿಕೆಯರಳಿಸಿ
ಕಣ್ಣು ಕಿರಿದಾಗಿ; ದೃಷ್ಟಿ ಮಂಜಾಗಿ;
ಪಕ್ಕದಲ್ಲವಳು ತಂದಿಟ್ಟ ಬಿಸಿ
ಕಾಫಿ ತಣ್ಣಗಾಗುವುದು

ಬರ
ಬರುತ್ತಾ ಪೇಪರಿಂದ ಅಕ್ಷ
ರಗಳೇ ಮಾಯ!
ಭಯ; ಕಾಣುತ್ತಿಲ್ಲ ಮತ್ತೆ
ಒರೆಸೊರೆಸಿ ಕನ್ನಡಕ
ದ ತುಂಬಾ ಗಾಯ ಸಣ್ಣಗೆ
ಚೀರಿದೆ ʼಏನೂ ಕಾಣದೆ!?ʼ

ಕಿವಿ ಚುರುಕು
ಮಡದಿ ಗೊಣಗಿದ್ದು ಕೇಳಿಸಿತು
ʼಪವರ್ ಬದಲಾಗಿದೆ
ಬದಲಾಯಿಸಬೇಕಿದೆ!ʼ

ಕನ್ನಡಕವೋ, ನಾನೋ!?
ʼಕಾಫಿಗಿಷ್ಟು ಬಿಸಿ ಬೇಕಾಗಿದೆʼ
ಕೇಳದಂತೆ ಗುಡುಗಿದೆ!

ಸ್ಕೂಲಿಗೆ ಹೋಗುವೆ

(ʼಗುಮ್ಮನ ಕರೆಯದಿರೆʼ ಪ್ರೇರಣೆ
ಪುರಂದರದಾಸರ ಕ್ಷಮೆ ಕೋರಿ)

ಸ್ಕೂಲಿಗೆ ಹೋಗುವೆನೆ ಅಮ್ಮಾ ನಾನು
ಸ್ಕೂಲಿಗೆ ಹೋಗುವೆನೆ
ಸುಮ್ಮನೆ ಕುಳಿತೆನು – ಡುಮ್ಮಗೆ ಆದೆನು
ಇನ್ನು ತಿನ್ನಿಸದಿರು – ಅಮ್ಮ ಹಸಿವೆ ಇಲ್ಲ

ಆನ್‌ಲೈನು ಕ್ಲಾಸಿಗೆ ಹೋದರೆ ನಾನು
ಕಣ್ಣು ಮುಚ್ಚಿ ಮಲಗುವೆ
ಟೀಚರು ಮಾಡುವ ಪಾಠಗಳೆಲ್ಲ
ಅರ್ಥವಾಗದೆ ಮತ್ತೆ ಮರೆತೆನಲ್ಲ

ಆಟದ ಬಯಲಿಗೂ ಲಾಕ್‌ ಡೌನೇನು
ಜಾರುಬಂಡೆ ಮುಚ್ಚಲೇಕೆ
ಗೆಳೆಯರ ಜೊತೆ ಸೇರಿ ಆಡುವುದನು ಬಿಡೆ
ಕೊಕ್ಕೊ ಕ್ರಿಕೆಟ್ಟಿಗೂ ನಾ ಸೇರುವೆ

ಮಗನ ಮಾತನು ಕೇಳುತ ತಾಯಿ
ಮುಗುಳುನಗೆಯ ನಗುತ
ಬೇಗನೆ ಕಂದಗೆ ವ್ಯಾಕ್ಸಿನ್‌ ಸಿಗಲೆಂದು
ಬಿಗಿಯಾಗಿ ಮಾಸ್ಕನು ಕಟ್ಟಿದಳಾಗ

(Pic Courtesy:Google)

ಬುದ್ಧ – ನುಡಿ

ಹಳತನು ಸುಟ್ಟು
ಹೊಸತಿಗೆ ಹುಟ್ಟು 
ಹಾಕಿದ ಕ್ರಾಂತಿಕಾರ

ಹಾದಿಯ ಅರಸು
ನೀನೇ ಗಮಿಸು
ನುಡಿಗಳ ಹರಿಕಾರ

ಶಾಂತಿ ನೆಮ್ಮದಿ 
ಹೃದಯದ ಬೆಳೆ  
ಬಿತ್ತಿದ ಬೆಳೆಗಾರ

ಮೆಟ್ಟುವ ಸೋಲನು
ಮೆಟ್ಟಿಲಾಗಿಸು
ಅಂದ ಧೈರ್ಯದಾತ

ತಿಳಿವಿನ ಸುಧೆಯಲಿ
ತಮಂಧವ ದೂಡಿ
ದಾರಿ ತೋರಿದಾತ 

ಅವಲೋಹ

ವಾಟ್ಸ್ಆ್ಯಪ್ ಮೆಸೇಜು ನೂರು
ಫೇಸ್ಬುಕ್, ಇನ್ ಸ್ಟಾ,  ಕೂ
ಯುವರ್ ಕೋಟ್, ಟ್ವೀಟು
ಬಿಡದೇ ನೋಡು ನೂರಾರು
ಪ್ರೈಮ್ ಟೈಮ್‌,ನೆಟ್ ಫ್ಲಿಕ್ಸ್ 
ಯುಟ್ಯೂಬ್, ಶೇರ್‌ ಚಾಟು
ಪೇಪರ್ ಓದು ಹೆದರು
ಟಿವಿ ನ್ಯೂಸು ಬರೀ ದೂರು
ಧಾರಾವಾಹಿ ಎಳೆ ಐದಾರು
ಗೆಳೆಯರ ಫೋನು ಹತ್ತಾರು
ಸೂರ್ಯ ಎದ್ದು ಮುಳುಗಿ
ದ ಮೇಲೂ ಬೇಕು ತಾಸು ಆರು
ಚಿತ್ತ ಸುದ್ದಿ ಸಂಗ್ರಹ
ಭ್ರಮಣದ ರಣಹದ್ದು

ಇಲ್ಲಿ ವಿನಾ ನಿಂತು
ಸಮಯವಿಲ್ಲವೆನ್ನುವವನು
ಬೆಳಕ ಪುಸ್ತಕಗಳಿಗೆ
ಬೆನ್ನುಹಾಕಿದವನು
ಅವಲೋಕ ಮರೆತವನು
ಪರುಷ ಸ್ಪರ್ಷವಿಲ್ಲದೆ
ಅವಲೋಹವಾಗುಳಿದವನು

ಹರಟೆ ಕಟ್ಟೆ

ಸಂಜೆಯತ್ತಲ ತನು
ಲವಲವಿಕೆಯಲಿ ಮನ
ದೂರವೆನಿಸದ
ಆಯಾಸವೆನಿಸದ ನಡಿಗೆ
ಅಲ್ಲಲ್ಲಿ ಬಿರುಕು
ಸಿಮೆಂಟುದುರಿದ
ಕೆಂಬಣ್ಣದಿಟ್ಟಿಗೆಯ
ಕಾಲಿಳಿಬಿಟ್ಟು ಹರಟೆ
ಗೆ ಪಕ್ಕಾದ ಪಟ್ಟಾಂಗ ಕಟ್ಟೆ

ದಿವಸಗಳ ದವಸ
ಹೊತ್ತ ಬಂಡಿಯವರು
ಸುದ್ದಿಗಳ ಕೊಡಕೊಳ್ಳುವವರು
ಬದಲಾದ ಸಂತೆ ಬೀದಿಗೆ
ದೂರುತ್ತಾ ಆಗಾಗ ನಿಟ್ಟುಸಿರು
ಪುಕ್ಕಟೆ ಪುರಾಣದವರು

ಲಲನೆಯರ ನಗೆಯಿಂದ
ಅಜ್ಜಿಅಳುವರೆಗೆ
ಉಂಡೆಗಟ್ಟಿದ ನೂಲ
ಗೋಜಲಿಲ್ಲದ ಬ್ರಹ್ಮಗಂಟು
ಬಿಡಿಸಿ ನೋಡುವ ತರಲೆ
ರಹಸ್ಯ ಜಾಲ ಭೇದಿಸಿದ
ಗಟ್ಟಿ ಟೊಳ್ಳು ಡೊಳ್ಳು ಹೊಟ್ಟೆ
ಕಾಯದವರ ಲೀಲೆ!

ಮಡದಿ ಹಂಗಿಸಿದ ಮುಖ
ಮಕ್ಕಳಾಡಿದ ವ್ಯಂಗ್ಯ
ಎದುರು ಮನೆ ಮಾನವರ
ನಿರ್ಭಾವ‌ ಮುಖ ಮರೆತು
ಮಿಕ್ಕಿರುವ ಇವರಲ್ಲೆ ಮೆರೆವ
ಅಟ್ಟಹಾಸದ ತವಕ

ಆಗುಹೋಗುಗಳ ಗೊಡವೆ
ಹಾದುಹೋಗುವವರ ನಡುವೆ
ಕೆದಕು ಕುತೂಹಲ
ಅರ್ಧ ಲೋಟದ ಕಾಫಿ
ಸುರುಳಿ ಸಿಗರೇಟು ಹೊಗೆಗೆ
ಸಹಸ್ರಾರಕ್ಕೆ ಚಿಟಿಕೆ ನಶ್ಯ
ದ ಘಾಟು, ಕಟ್ಟೆ ಪಕ್ಕದ ಖುಲ್ಲ
ಹೋಟೆಲ್ಲು ಗಲ್ಲದ ಮೇಲೋಬ್ಬರು
ತಂಬಾಕು ಮೆಲ್ಲುತ್ತಾ
ನೋಟಿಗೆ ಚಿಲ್ಲರೆ ಕೊಡುವವರು

ನಿರಾಶೆ ಮಳೆಗೆ ಕೊಡೆಹಿಡಿದು
ಹೆಜ್ಜೆ ಹಗುರಾಗಿಸುವ
ರಾಡಿ ತಿಳಿಯಾಗಿಸುವ
ಮೆಟ್ಟಲಿರುವ ವೈರಾಗ್ಯ ಅಟ್ಟುವ
ರಾತ್ರಿ ನಿದ್ರೆಗೆ ಉಪಾಯಗಳ
ಆವಿಷ್ಕಾರದ ಮಗ್ಗುಲು ಬದಲಿಸುವ
ಕಳೆವ ಲೆಕ್ಕದವರು ಕಲೆವ
ಬೀಳ್ಕೊಡುಗೆಯಲಿ ನಾಳೆಯ
ಆಸೆ ಹೊತ್ತಿಸುವ ಸೋಮಾರಿ ಕಟ್ಟೆ

(Published in:https://panjumagazine.com/?p=17629}

ಬಹದ್ದೂರ

ಶಾಸ್ತ್ರೀ ನಮ್ಮ
ಎರಡನೆ ಪ್ರಧಾನಿ
ದೇಶದ ಮುತ್ಸದ್ದಿ
ಮಹಾನ್ ಜ್ಞಾನಿ

ಪಾತಕಿ ಪಾಕಿನ
ಯುದ್ಧ ಉನ್ಮಾದಕೆ
ಆಯಿತು ಶಾಸ್ತಿ
ನುಗ್ಗೆ ಲಾಹೋರಿಗೆ

ಶಾಸ್ತ್ರೀ ನಡೆದರೂ
ಗಾಂಧೀ ಹಾದಿ
ಕಾದುವಾಗ ಲಾಲ್‌
ಬಹದೂರ್ ಗರಿ

ವಿಜಯದ ನಡಿಗೆಗೆ
ಸಂಚಿನ ಬೆನ್ನಿಗೆ,
ʼವಾಮನʼ ಆದನೆ
ʼಬಲಿʼ ಆ ವಿಧಿಗೆ

ಹೊರಟ ‘ಸಪಬ’

ಪಿಬಿ ಎಸ್, ಎಸ್ ಪಿಬಿ
ಪಬಸ, ಸಪಬ
ಮೂರೇ ಅಕ್ಷರ 
ಮೂರು ಸ್ವರ
ಸಿಕ್ಕಿದರಿಬ್ಬರು ಕನ್ನಡಕೆ
ಹೊಕ್ಕರು ಎಲ್ಲರ ಮಾನಸಕೆ

ಗಾನದಿ ತಣಿಸಿದ
‘ಸಪಬ’ ಹೊರಟಿತೆ
ನಮ್ಮ ತೊರೆದು ಇಂದು
ಅವಸರವೇಕೋ
ಬಯಸಿತು ಏಕೋ
ನಮ್ಮೆಲ್ಲರ ಅಶ್ರು ಬಿಂದು

(Pic from Google)