ಮತ್ತೊಂದು ಬೆಳಕು

Chester

ನಾನಿನ್ನ ಕಡೆಗಣಿಸಿದ್ದೆನೇನು!?
ಅದಕ್ಕೆ ಸಾಕ್ಷಿಗುರುತುಗಳಿದ್ದುವೇನು?
ಉಳಿಯಲೇ ಬೇಕಿತ್ತು ನೀನು …..
ಗೆಳೆಯ…
ಮತ್ತೆಂದೂ ಘಾಸಿ ಮಾಡೆನೆಂದು
ಪ್ರಮಾಣಕ್ಕೆ ಕೈ ಚಾಚಬೇಕಿತ್ತೇನು?

ಪ್ರಪಂಚ ನಿದ್ರಿಸುವ ಸಮಯದಲ್ಲಿ
ಪ್ರತಿಭೆಯ ಪ್ರಭೆಯ ಕಂಡಿದ್ದೆವಲ್ಲ!
ನಾವು ಹೊಂದಬಹುದು ಏನೆಲ್ಲವ
ಆದರದು ಉಳಿಯುವಂತಿಲ್ಲ!

ಜನ ಹೇಳಿಯಾರು,
ಲಕ್ಷಾಂತರ ತಾರೆಗಳಲ್ಲಿ
ಒಂದು ಬೆಳಕು ಆರಿದರೇಕೆ ಚಿಂತೆ?
ಅದು ಮಿನುಗಿ ಮರೆಯಾಗಲಿ…ಮಿನುಗಿ ಮರೆಯಾಗಲಿ…..
ಯಾರೋ ಒಬ್ಬ ಸರದಿ ಮುಗಿಸಿದರೆ ಚಿಂತೆಯೇಕೆ?
ನಾವೂ ಸರದಿಗಾರರೆ
ಸರಿದೇವು ಕ್ಷಣದಲ್ಲಿ… ಯಾವುದೇ ಕ್ಷಣದಲ್ಲಿ….
ಒಂದು ಬೆಳಕು ಮರೆಯಾದರೆ ಚಿಂತೆಯೇಕೆ?
…..
ಆದರೆ ನನ್ನೊಳಗೆ ಎಂದಿಗೂ ನಿನ್ನ ಕೊರತೆಯ ಕೊರಗು….

ನೆನಪು ನೆಲದಿಂದ ಪಾದಗಳ ಎಳೆಯುತ್ತಿವೆ
ಊಟದ ಕೋಣೆಯಲ್ಲಿ ಅಗತ್ಯಕ್ಕಿಂತ
ಹೆಚ್ಚಿನದೊಂದು ಕುರ್ಚಿ ನಿರೀಕ್ಷೆಯಲ್ಲಿದೆ..
ಓಹ್…! ಕೋಪವಿದೆ ಅದು ಸಹಜವೆ
ನೀನಿಲ್ಲದ ಶೂನ್ಯವೂ ನ್ಯಾಯವಲ್ಲ ಅಲ್ಲವೆ?
ಆದರೂ….
ನಿನ್ನ ಕಂಡಿಲ್ಲ ಅಂದಮಾತ್ರಕ್ಕೆ
ಇಲ್ಲ ಅಂದುಕೊಳ್ಳುವುದೂ ಸರಿಯಲ್ಲ

ಹೌದು….
ನಾವೂ ಸರದಿಗಾರರೆ
ಸರಿದೇವು ಕ್ಷಣದಲ್ಲಿ ಯಾವುದೇ ಕ್ಷಣದಲ್ಲಿ …

(ಅಮೇರಿಕಾದ ಚೆಸ್ಟರ್ ಬೆನಿಂಗ್ಟನ್ ‘ಲಿಂಕಿನ್ ಪಾರ್ಕ್’ ರಾಕ್ ಬ್ಯಾಂಡಿನ ಪ್ರಸಿದ್ಧ ಗಾಯಕ. ‘ಮತ್ತೊಂದು ಬೆಳಕು’ ಅವನೇ ಹಾಡಿದ ಕವಿತೆ. ಎಳೆಯನಿದ್ದಾಗ ಕಷ್ಟಗಳನುಂಡು ಬೆಳೆದರೂ, ಚೆಸ್ಟರ್ ಕೀರ್ತಿಯ ಮೆಟ್ಟಿಲೇರಿದ. ಸುಖದ ಸಂಸಾರಿಯಾದ. ಇತ್ತೀಚೆಗೆ ತನ್ನ ನಲವತ್ತೊಂದನೆಯ ವಯಸ್ಸಿನಲ್ಲಿ ಅಕಾರಣ ಆತ್ಮಹತ್ಯೆಗೆ ಶರಣಾದ. ಇದು “One more light” ಹಾಡಿನ ಭಾವಾನುವಾದ. )

02chester

 

Advertisements