ನರನ ನೆರಳು

 

Naraneralu

ರಸ್ತೆ ಬದಿ ಬಣ್ಣ ಕಳಕೊಂಡ ಸೀರೆಯಲ್ಲಿ
ಬೇಡುವ ಮ್ಲಾನ ಹೆಂಗಸ ಮಡಿಲ ಸುಖ
ನಿದ್ರೆಯ ಮಗು – ಹಾಯ್ವ ಶಂಕೆಯ ನೆರಳು

ರಾತ್ರಿ ಅಲ್ಲಲ್ಲಿ ಪೊಲೀಸರ ಕಳ್ಳ ನಗು
ಕಾಣಿಸದು – ಮನೆ ದಾರಿ ಬಲುದೂರ
ರಸ್ತೆಯುದ್ದ ಬೆಚ್ಚಿಸುವ ನಗೆಯ ನೆರಳು!

ಅಕ್ರಮದಲ್ಲೆದ್ದ ಬಡಾವಣೆಗಳಲ್ಲಿ ಬೀದಿ
ನಾಯಿಗಳಗಟ್ಟಿನೂಳು – ಸಾತ್ವಿಕನ ನಡೆಗೆ
ಸಾಕಿದ ದಂಡು ತಳಿನಾಯಿಗಳ ಬೊಗಳು!

ಮಗು ಕೈಗೆ ಮೊಬೈಲು ಯೌವನದ ವಿರತಿ
ಮುದಿಯಲ್ಲಿ ನಿರ್ಲಜ್ಜೋತ್ಸಾಹ
ವಿದ್ಯಾಲಯಗಳ ಗೋಡೆ – ವಿಕೃತ ನೆರಳು

ಚಿಕ್ಕ ಕಾಹಿಲೆಗೆ ದೊಡ್ಡ ವೈದ್ಯರುಗಳ
ಮೃದು ಶಸ್ತ್ರಚಿಕಿತ್ಸೆ – ಹೊಲಿಗೆ ಹಾಕುವಾಗ
ನಂಬಿಕೆಗಳ ಮೇಲೆ ಬರೆಯ ನೆರಳು

ವೀಣೆಯ ತಂತಿ ಮೃದಂಗ ಚರ್ಮ
ಪಿಟೀಲಿನ ಕಡ್ಡಿ ಚಲಿಸುವ ಕೈಗಳು
ಕಂಪಿತ ಸ್ವರ ತಪ್ಪಿ ಸಾಧನೆಗೆ ಜಡ್ಡು ನೆರಳು

ಭಕ್ತಿ ಜಗಜಗಿಸಿ ಕಣ್ಣು ಶಿರಕ್ಕೆ ತಾಕಿಸಿದಾರತಿ
ಕಾಣಿಕೆ ಭಂಡಾರಕ್ಕೆ ಸೆಳೆವ ಸಣ್ಣ ರಂಧ್ರ
ದೇವರೆದುರು ಸಾಷ್ಟಾಂಗ ಸ್ವಾರ್ಥ ನೆರಳು!

ಅಳಿದ ರಾಜರ ಛಾಯೆಯಲಿ ಮನುವ ಹಳಿವ
ಮೇಧಾವಿ ದಂಡು – ಆಳುವ ಹಳಿ ಹಿಡಿದು
ನಿರಂತರದ ಜಿದ್ದಿನ ತುಳಿತದ ನೆರಳು!

ಅರ್ಧ ಬಿತ್ತಿದ ಹೊಲ ಕಳೆದುಹೋದ ಕಾಲ
ಸೂರ್ಯ ಕಾದ ಉರುವಲು – ಪ್ರಕೃತಿಗೆ
ಕಾಡುವ ನರನ ಅಪ್ರಬುದ್ಧತೆಯ ನೆರಳು

(ಚಿತ್ರ: Pixabay)

Neralu

(ಕನ್ನಡ ಪ್ರತಿಲಿಪಿಯಲ್ಲಿ ಪ್ರಕಟಿತ: https://kannada.pratilipi.com/story/%E0%B2%A8%E0%B2%B0%E0%B2%A8-%E0%B2%A8%E0%B3%86%E0%B2%B0%E0%B2%B3%E0%B3%81-tKNIfh81rtKB)

 

Advertisements

ಮತ್ತದೇ ಹೊತ್ತಿತು

wordpress

ನನ್ನ ಯೌವನ ಕಳಚಿ
ವರುಷಗಳೇ ಉರುಳಿದವು
ಮರೆವಿನಾಸರೆ ಪಡೆದು
ತೊರೆದೆನವಳ ನಿರಾಳ
ಈಜಿ ಇಹಸುಖದಾಚೆ ಉಸಿರ ಪಡೆದೆ

ಹಿಡಿದ ಲೇಖನಿ ತೊಡೆದು
ಮಸಿಯಾಚೆ ಚೆಲ್ಲಿದೆ
ಬರೆವ ಆಸೆಯ ಸರಿಸಿ
ಪ್ರೇಮದೊರತೆ ಬತ್ತಿಸಿದೆ
ಪ್ರಜ್ಞತೆಯ ದಾರಿಯಲಿ ವ್ಯಸ್ತನಾದೆ!

ವಿಮುಖದ ಗುರಿಹಿಡಿದು
ದೃಢಮನದ ಗಡಿಯಾದೆ
ಪ್ರೇಮಿರೂಪವ ಕಳಚಿ
ಪ್ರಬುದ್ಧರೂಪವ ಪಡೆದೆ
ಆಸೆತೊರೆವಾತುರದ ಗ್ರಸ್ತನಾದೆ!

ಭ್ರಾಂತಮನ ತೊಲಗಿಸಿದೆ
ಶಾಂತ ಸಾಗರವಾದೆ!
ಬರೆವ ಹಂಬಲ ಮರಳಿ
ಲೇಖನಿಗೆ ಹಾತೊರೆದೆ
ದಾಖಲಿಸೆ ಪುಟಗಳಲಿ ಜೀವನ ರಸರಮ್ಯ

ಬಿಡದೆ ಬರೆದೇ ಭರದೆ
ಒಳಹೊರಗ ಮರೆತೆ
ದಿನಮಾನಗಳುರುಳಿದವು
ಹೊಸೆದೆ ಹೊತ್ತಿಸಿದೆ ದಿವ್ಯ
ಮರಳಿ ಅರಳಿದವೇ ಪರಿಮಳ ಪ್ರೇಮಕಾವ್ಯ!

– ಅನಂತ ರಮೇಶ್

(Published in Kannada.Pratilipi e magazine: Link: https://kannada.pratilipi.com/story/%E0%B2%AE%E0%B2%A4%E0%B3%8D%E0%B2%A4%E0%B2%A6%E0%B3%87-%E0%B2%B9%E0%B3%8A%E0%B2%A4%E0%B3%8D%E0%B2%A4%E0%B2%BF%E0%B2%A6%E0%B3%86-BIWXHGqBozaE)

ವಿದ್ಯಾ ಭೂಷಣ

Vidyabhushan

ಪದ್ಯಕ್ಕೆ ಮೊದಲು

ಭಕ್ತಿ ಮನಸ್ಸಿನ ಅನೇಕ ಚಕಿತ ಸ್ಥಿತಿಗಳಲ್ಲೊಂದು. ’ದೈವ’ಭಕ್ತಿ
ಮನುಷ್ಯ ಮನಸ್ಸನ್ನು ತಿಳಿಯಾಗಿಸುವ ಒಂದು ದಾರಿಯೂ ಹೌದು.
ಈ ತಿಳಿಗೊಳಿಸುವ ಕ್ರಿಯೆಯಲ್ಲಿ ತೊಡಗಿಸಿಕೊಳ್ಳುವುದು ದೇವ’ಸ್ತುತಿ’.
ಅದಕ್ಕೆ ಇಂಬು ಕೊಟ್ಟು ಮನಸ್ಸನ್ನು ತೇಲಿಸುವುದು ಸ್ತುತಿ ಭಾವತುಂಬಿ
ರಾಗದಲ್ಲಿ ಹರಿದಾಗ.

ಕೀರ್ತನೆಗಳಿಗೆ ಪಂ.ಭೀಮಸೇನ ಜೋಶಿಯವರಂತೆ ಜೀವ ತುಂಬಿ
ಹಾಡಿದವರು ಶ್ರೀ ವಿದ್ಯಾಭೂಷಣರು. ಸಂಗೀತ ಜ್ಞಾನವಿಲ್ಲದ
ನನ್ನಂತಹ ಮಂದಿಗೆ ಅವರು ತಮ್ಮ ಸಿರಿಕಂಠದಿಂದ ದಾಸರ
ಪದಗಳತ್ತ ಸೆಳೆದಿದ್ದಾರೆ. ದಾಸ ಸಾಹಿತ್ಯದ ತಿರುಳು ಉಣಬಡಿಸಿದ್ದಾರೆ.
ಮನಸ್ಸನ್ನು ತಿಳಿಗೊಳಿಸಿದ್ದಾರೆ.

ಅವರ ಕಂಠಕ್ಕೆ ಮಾರುಹೋಗಿ ಮೂರು-ನಾಲ್ಕು ದಶಕಗಳೇ ಸರಿದಿವೆ.
ಅವರ ಹಾಡುಗಾರಿಕೆಯ ಅಭಿಮಾನಿಯಾಗಿ ನಾಲ್ಕು ಸಾಲು,
“ವಿದ್ಯಾ ಭೂಷಣ” ಕವಿತೆ ರೂಪದಲ್ಲಿ….

 

ವಿದ್ಯಾ ಭೂಷಣ

ಪವಡಿಸಿದಲ್ಲಿಂದ ಪನ್ನಗಶಯನ ಏಳಲೊಲ್ಲ
ಕೇಳದಿರೆ ದಿನವೂ ಈ ಉದಯರಾಗದ ಸೊಲ್ಲ!

ದಾಸಾದಿ ಸಂತ ಯತಿ ಕವಿಕೋವಿದರೆಲ್ಲ
ಸ್ವರ್ಗ ಸಭೆಯಲ್ಲಿ ಕಲೆತು ಕೊರಗಿದರು !
ಕೀರ್ತನೆಗಳ ತಾವೆ ಮತ್ತಷ್ಟು ಬರೆಯದೆ
ಈ ನಾಲಿಗೆಯಲ್ಲಿ ನುಡಿಸಿ ಕೇಳಲಾಗದೆ !!

ವೇದ ಓದಿ ವ್ಯಾಕರಣ ಬರೆದು ರಾಗ ಪಲುಕಿದ
ಕಂಠಸ್ತರೆಲ್ಲರೂ ತಮ್ಮಲ್ಲೆ ಎಚ್ಚೆರೆಚ್ಚರು
ಇವರುಲಿವ ಸ್ಪಷ್ಟತೆಗೆ ಆಲಾಪಕ್ಕೆ ತದೇಕಕ್ಕೆ
ವಾತ್ಸಲ್ಯ ವಾಣಿ ಭಕ್ತಿ ಉಕ್ತಿಗಳುಕ್ಕುವ ರಸಕ್ಕೆ

ಪಾಡಿದರೆ ಪಾಮರರ ಮಸ್ತಕದ ರಸಾತಲಕ್ಕೆ
ಪಾತಾಳಗರಡಿ ಬಿಟ್ಟು ಭಕ್ತಿಯೆಂಬ ಮುತ್ತು
ಹೆಕ್ಕಿ ಹೃದಯಕ್ಕಿಡುವ ಗಾರುಡಿಗ ಕಂಠಕ್ಕೆ
ನಾರಾಯಣ ನಲಿದಾಡುವ ಹೂ ನಗೆ ಹೊತ್ತು

ಅಮ್ಮಂದಿರ ನಡುವೆ ಗಣಪನ ಕುಳ್ಳಿರಿಸಿ
ಶೇಷಶಾಯಿಗೆ ಕುಳಿತು ಕೇಳುವಂತೆ ರಾಗಿಸಿ
ವ್ಯಾಸಪುರಂದರಕನಕರ ಗೀತ ಪಾರಾಯಣಿಸಿ
ತಪಿಸುವರಿಗೆ ವಿರಮಿಸದೆ ಉಣಿಸುವ ಸಂವೇದಿ

ಉಗಾಭೋಗ ಬಡಿಸಿದ ಬಳಿಕ ಏನ ಬೇಡಲಿ!?
ಭಾಗ್ಯದಲಿ ತೇಲಿಸಿ ದಡ ಮುಟ್ಟಿಸಿ ಸುಖಿಸುವ
ಈ ಹಾಯಿಗಾರನ ಗಮನ ದಾಸವಾಣಿಯ ದಿಕ್ಕು
ನಿಬಿಡವಾಗಿದೆ ಸರಿಗಮ ಸ್ವರ ಸಿರಿ ಕಂಠ ಹೊಕ್ಕು!

ಮುಕ್ತಿಗಿಲ್ಲಿಂದ ರಹದಾರಿ ಸಿಕ್ಕಂತೆ ಮಾಧುರ್ಯ
ದೊಳ ಮುಳುಗಿ ಮೀವ ಮೀಮಾಂಸರು;
ಆಲಾಪ ಸಲ್ಲಾಪಕ್ಕೆ ಲೆಕ್ಕತಪ್ಪುವ ಅವಲೋಕಿಗರು
ಸದ್ಭಾವದಲಿ ಸಲಿಲ ತೇಲುವ ಲೌಕಿಗರು !

ವಾತ್ಸಲ್ಯದ ಅನುರಣಿತ; ಒಳತೋಟಿ ಅಪ್ರಕಟಿತ
ಉಕ್ಕುವ ಕೀರ್ತಿಯಂಬರದ ಹಂಬಲದನಾಸಕ್ತ
ಸ್ವರಗಳ ಅನುರಾಗಿಸುವ ಕೊರಳ ಪಯಣ;
ಬಲು ಚೆನ್ನ ಮಧುಕರ ವೃತ್ತಿ; ಅಪ್ರಮತ್ತ ಗಾನ !

ಈ ದನಿ ಹೊತ್ತಿದೆ ಭಕ್ತಿ; ಹೊತ್ತಿಸುತ್ತದೆ ರಕ್ತಿ
ಸಾದರಿಸುವ ವಿರಾಗದಲೆ ತೆರೆ, ಜಿಜ್ಞಾಸೆ ತೊರೆ
ದಾಲಿಸೆ ಮನಮನ ಬೆಸುಗೆ, ಹುರಿಗಟ್ಟಿ ಭಕ್ತಿ
ಬಾಗಿ ಸಕಲೇಂದ್ರಿಯದೊಳಗೂ ವಿರಕ್ತಿಯೊಸಗೆ !

          – ಅನಂತ ರಮೇಶ್

ದೇವರು ಮತ್ತು ಸಾಕ್ಷಿ

mother1

ಆಸ್ತಿಕ ಮಾಸ್ತಿಗೆ
ನಾಸ್ತಿಕರೊಬ್ಬರು ಕೇಳಿದರು
‘ದೇವರ ನೀವು ನಂಬುವಿರ
ಅವನ ಇರುವಿಕೆಗೆ ಸಾಕ್ಷಿಇದೆಯ?’

ನಕ್ಕರು ಮಾಸ್ತಿ,
ಅವರ ನುಡಿ ಸ್ವಸ್ತಿ,

’’ತಾಯಿಯ ನೆನೆ
ಅವಳಲ್ಲವೆ ಮಮತೆಯ ಕೆನೆ?
ನಿಸ್ವಾರ್ಥ ಕಳಕಳಿ ಕರುಣೆ
ಅವಳ ವಾಂಛೆಗೆಲ್ಲಿಯ ಎಣೆ!
ದೈವ ಭಾವ ಅಮೂರ್ತತೆ …
ಅದರ ಮೂರ್ತ ರೂಪವೆ ಮಾತೆ

ಮಾತೃತ್ವದ ಹೃದಯ
ಜೀವಿಗಳಿಗೆ ಕೊಟ್ಟ ಅದ್ಭುತವೆ
ದೇವನಿರುವಿಗೆ ಸಾಕ್ಷಿಯಲ್ಲವೆ?”

ಉತ್ತರಿಸಿದರು
ಮಗುವಿನ ನಗುವಿನ ಮಾಸ್ತಿ
ನುಡಿ ಸ್ವಸ್ತಿ

 

(Pic.Courtesy-Pixabay)

ಹನಿ ಧ್ವನಿ

modi

ಕೂಗು

‘ಮೋದಿ ಮೋದಿ’ ಕೂಗುವುದು
ಕೇಳಿ ಕೇಳೀ ಬೇಜಾರಾಗಿದೆ ಅಂದೆ
ಗುಂಪಲ್ಲೊಬ್ಬರು ಕೇಳಿದರು
‘ನಮೋ ನಮೋ’ ಅಂದರೆ ಹೇಗೆ!

 

ಹುಮ್ಮಸ್ಸು

ಚಾಯ್ ಚಾಯ್ ಅಂತ
ಕೂಗುವವರ ಧ್ವನಿಯಲ್ಲಿ
ಬಹಳ ಹುಮ್ಮಸ್ಸಿದೆ
ಚಾಯ್ ವಾಲಾ
ಅಂತ ಕೂಗುವುದರಲ್ಲೂ
ಬಹಳ ಗಮ್ಮತ್ತಿದೆ!

 

ಹೊಸ ಇರಾದೆ

ಮೈಸೂರಲ್ಲಿ ಮೊನ್ನೆ ಆದದ್ದು
ಸಾಹಿತ್ಯ ಪ್ರೇಮಿಗಳಿಗೆ ಪುಸ್ತಕ ಜಾತ್ರೆ
ಪಟ್ಟ ಗಿಟ್ಟಿಸಿಕೊಂಡವರಿಗೆ ಇದ್ದದ್ದು
ಪಕ್ಷ ಪ್ರಚಾರದ ಇರಾದೆ !

 

ಅದಕ್ಷ

ಬೈಸಿಕೊಳ್ಳುತ್ತ ವ್ಯಂಗಿಸಿಕೊಳ್ಳುತ್ತ
ಅಧ್ಯಕ್ಷನಾದರೆ
ಅದು ಸಾಹಿತ್ಯಸಮ್ಮೇಳನಕ್ಕೆ
ಸಂಬಂಧಿಸಿದ್ದು ಅನ್ನುವುದು ಸುಳ್ಳು
ಕಾಂಗ್ರೆಸ್ ಪಕ್ಷದ ಸಮಾವೇಶವೂ
ಇದೆಯಲ್ಲ ಮುಂದು!

 

ಹಿನ್ನಡೆ

ಬೇರೆ ಯಾರೋ ಏರುತ್ತಾರಂತೆ
ಕಾಂಗ್ರೆಸ್ ಪಕ್ಷದ ಅಧ್ಯಕ್ಷ ಗದ್ದುಗೆಗೆ
ಕೊನೆಗೂ ಕಾಂಗ್ರೆಸ್ಸಿನಲ್ಲಿ
ಹಿನ್ನಡೆಯಾಯ್ತು ಮೋದಿಗೆ !

 

(ಚಿತ್ರ-ಅಂತರ್ಜಾಲ)

 

 

ಆಸೆ

fall

ಅಂಬಿಗರ ಚೌಡಯ್ಯ ನುಡಿ ವಚನ

“ಆಶೆಯುಳ್ಳಾತನೊಬ್ಬರಾಧೀನದಲ್ಲಿಪ್ಪ”

 

ಆಸೆ ಮನಸ್ಸಾವರಿಸಿತು

ಅಧ:ಪತನಕ್ಕೆ ಹೆಜ್ಜೆ ಊರಿಸಿತು

ಗುಲಾಮೀತನಕ್ಕಂಟಿಸಿತು,

ಶಿಷ್ಟಾಚಾರದ ಕೈಹೊಸಕುತ್ತ

ದುಷ್ಟವಿಚಾರ ಅಂಕುರಿಸಿ

ಲೋಲುಪತೆ ಲಾಲಿಸಿತು

ಕಳೆಯದ ಕಳವಳವೆ ಮಾಯೆ

ಆಸೆಯೊಳು ಹುದುಗಿದೆ

ಪರಾಧೀನ ಛಾಯೆ!

 

(Picture courtesy- pixabay)

ಮಕ್ಕಳ ಸಾಹಿತ್ಯ ಕೃಷಿಕ – ಶ್ರೀ ಗುರುರಾಜ ಬೆಣಕಲ್

 

‘ನೋಡೋಕೆ ಭಾರೀ ದೊಡ್ಡ ಕುಳಾ
ನಮ್ಮಯ ರಂಗೂ ಮಾಮ
ಬೆಳ್ಸಿದ್ದಾನೆ ತನ್ನ ದೇಹಾನ
ಇಲ್ಲ ಲಂಗೂ ಲಗಾಮ!’

ಮೊನ್ನೆ ನನ್ನ ಗೆಳೆಯನ ಮನೆಗೆ ಹೋಗಿದ್ದೆ.     ಗೆಳೆಯನ  ಪುಟ್ಟ ಮಗ   ಪುಸ್ತಕವೊಂದನ್ನು  ಓದುತ್ತಾ ತಮಾಷೆಯಲ್ಲಿ ಹಾಡುತ್ತಿದ್ದ!      “ಯಾವ್ದು ಪುಟ್ಟಾ ಪುಸ್ತಕ?” ಅಂತ ಕೇಳಿದೆ.  ತೋರಿಸಿದ. ನೋಡಿದೆ. “ಹೂವೇ ಹೂವೇ” ಅನ್ನುವ ಮಕ್ಕಳ ಕವಿತೆಗಳ ಪುಟಾಣಿ ಪುಸ್ತಕ. ಶ್ರೀ ಗುರುರಾಜ ಬೆಣಕಲ್ ಲೇಖಕರು.

ಕಳೆದ ತಿಂಗಳಲ್ಲಿ ಸಾಹಿತ್ಯ ಪರಿಷತ್ತಿನಲ್ಲಿ ಪುಸ್ತಕವೊಂದರ ಬಿಡುಗಡೆ ಕಾರ್ಯಕ್ರಮಕ್ಕೆ ನಾನು ಹೋಗಿದ್ದು ನೆನಪಾಯಿತು.   ಬಿಡುವಿನಲ್ಲಿ  ಒಬ್ಬ  ಯುವಕ  ಶ್ವೇತವಸ್ತ್ರಧಾರಿ  ಹಿರಿಯರೊಬ್ಬರನ್ನು  ಮಾತಾಡಿಸಲು ತೊಡಗಿದ್ದ.

“ಸರ್.. ನೀವು ಗುರುರಾಜ ಬೆಣಕಲ್ ಅಲ್ವ?”

ಅವರು ಅವನನ್ನೆ ಗಹನವಾಗಿ ನೋಡುತ್ತ “ಹೌದು” ಅಂದರು! ಯುವಕನಿಗೆ ತುಂಬಾ ಖುಷಿ. ತನ್ನನ್ನು ಪರಿಚಯಿಸಿಕೊಳ್ಳುತ್ತಾ ಹೇಳುತ್ತಿದ್ದ,     “ಸರ್..   ನಾನು ಚಿಕ್ಕವನಿದ್ದಾಗಿನಿಂದ ನಿಮ್ಮ ಪುಸ್ತಕಗಳನ್ನು ಓದಿದ್ದೇನೆ. ಇತ್ತೇಚೆಗೆ ಹುಬ್ಬಳ್ಳಿಯಲ್ಲಿ ನಿಮ್ಮ ಕತೆಗಳ ಮತ್ತು ಕವಿತೆಗಳ ಪುಸ್ತಕಗಳು ಬಿಡುಗಡೆ ಆಗಿವೆ ಅಲ್ವ?” ಬೆಣಕಲ್ ಬಹಳ ಖುಷಿಯಿಂದ ಆ ಯುವಕನೊಡನೆ ಸಂಭಾಷಣೆಯಲ್ಲಿ ತೊಡಗಿಬಿಟ್ಟರು!

ಕಾರ್ಯಕ್ರಮ ಮುಗಿದಮೇಲೆ ಅವರಿಗೆ ನನ್ನ ಪರಿಚಯಿಸಿಕೊಂಡೆ.   ನಾನು ಅವರ ಅನೇಕ ಕತೆ, ಕವನಗಳನ್ನು ಪತ್ರಿಕಗಳಲ್ಲಿ ಓದಿದ್ದೆ.   ಶಿಶು ಸಾಹಿತ್ಯದಲ್ಲಿ ಗುರುರಾಜ ಬೆಣಕಲ್ ದೊಡ್ಡ ಹೆಸರು. ಅವರಿಗೀಗ ವಯಸ್ಸು ಎಪ್ಪತ್ತು ಆದರೆ ಏಳು ವರ್ಷಗಳ ಮಗುವಿನ ಕುತೂಹಲ, ಸರಳತೆ ಮತ್ತು ಜೀವನೋತ್ಸಾಹ ಉಳಿಸಿಕೊಂಡಿದ್ದಾರೆ. ಮಾತಾಡತೊಡಗಿದರೆ ನಮ್ಮೊಡನೆ ಮಕ್ಕಳಾಗುತ್ತಾರೆ. ಇಂದಿಗೂ ಮಕ್ಕಳ ಆದರ್ಶಗಳೇನಿರಬೇಕೆಂಬ ಕನಸುಗಳನ್ನು ತಮ್ಮ ಲೇಖನಿಯಲ್ಲಿ ಮೂಡಿಸುತ್ತಿರುತ್ತಾರೆ.

ಬೆಣಕಲ್ಲರ ಪರಿಚಯವಾದ ಮೇಲೆ, ಅವರ ಸಂದರ್ಶನಕ್ಕೆಂದು ಅವರ ಮನೆಗೂ ಭೇಟಿ ಕೊಟ್ಟಿದ್ದೇನೆ. ಅವರೊಂದಿಗೆ ಕಳೆದ ಮೌಲಿಕ ಸಮಯ, ಸಂಭಾಷಣೆ, ಅವರು ಹಾಡಿದ ಕೆಲವು ಕವನಗಳ ಸಾಲುಗಳನ್ನು ಇಲ್ಲಿ ದಾಖಲಿಸಿದ್ದೇನೆ.
.
ಬೆಣಕಲ್ಲರು ತಮ್ಮ ನೆನಪಿನ ಸುರುಳಿ ಬಿಚ್ಚಿ ಮಾತಾಡತೊಡಗಿದರು. ತಮಗೆ ಸ್ಪೂರ್ತಿ ತುಂಬಿ ಶಿಶು ಸಾಹಿತ್ಯಕ್ಕೆ ಒತ್ತು ನೀಡಲು ಪ್ರೇರೇಪಿಸಿದ ಬಹಳ ಮಂದಿ ಹಿರಿಯ ಸಾಹಿತಿಗಳನ್ನು ನೆನೆದರು.

“ಸರ್.. ನಿಮ್ಮ ಕೆಲವು ಪದ್ಯಗಳನ್ನು ವಾಚಿಸುತ್ತೀರ?” ಎಂದು ಆಸೆ ತೋರಿದೆ. ಹಾಡಿಯೂ ಬಿಟ್ಟರು!

‘ಹೀಗಿರಬೇಕು’ ಅನ್ನುವ ಕವನದ ಸಾಲುಗಳು ಮಧುರವಾಗಿ ಹಾಡಿದರು.

ಹೇಗೆ ವನದಲಿ
ಪಕ್ಷಿಯು ಕೂಡಿರುವಂತೆ
ಬಿಸಿಲು ಚಳಿ ಮಳೆ ತಾ ಸಹಿಸುತ
ದಿನವಿಡಿ ನಲಿವಂತೆ

ಚೆಲುವ ತಾರೆಗಳು
ಮುಗಿಲಲಿ ತಾವಿರುವಂತೆ
ಎನಿತ್ತೊ ಕತ್ತಲೆ ಇದ್ದರೂ ಬಾನಲಿ
ಚಕಮಕ ಹೊಳೆವಂತೆ

ಹೀಗೆ ಪ್ರಕೃತಿಯ ಉದಾಹರಣೆಗಳನ್ನು ಕೊಡುತ್ತಾ ಹಾಡು ಮುಗಿಸಿದರು,

ಇವುಗಳ ಹಾಗೆ ಯಾರು ಇರುವರೊ
ಅವರ ಬಾಳದು ಚಂದ
ಅವರ ಹೆಸರು ಬೆಳಗಿದೆ ಜಗದಲಿ
ಬಲು ಒಲುಮೆಯಿಂದ

ಹಾಗೆಯೆ ಮತ್ತೊಂದು ಕವನ ಹಾಡಿದರು,

ಅಮ್ಮ ನನಗೆ ರೆಕ್ಕೆ ತೊಡಿಸು
ಹಾರುವೆ ನಾ ನಭಕೆ
ನನಗೆ ಆಗಿದೆ ಮುಗಿಲು ಸುತ್ತುವ
ಅಂದಚಂದದ ಬಯಕೆ

ಓಡುವ ಮೋಡದ ಜಾಡನು ಹಿಡಿದು
ಚಂದಿರ ಲೋಕಕೆ ಹೋಗಿ
ಅಲ್ಲಿ ಸುಂದರ ಮನೆಯನು ಕಟ್ಟಿ
ಕರೆಯುವೆ ನಿನ್ನನು ಕೂಗಿ!

ನನ್ನ ಕೇಳುವ ಉತ್ಸಾಹ ಕಂಡು ‘ಅಪ್ಪ’ ಅನ್ನುವ ಕವಿತೆಯನ್ನೂ ಹಾಡಿಬಿಟ್ಟರು.

ಮೇಲು ನೋಟಕೆ ಅಪ್ಪನು ಕಠಿಣ
ಪ್ರೀತಿ ಪ್ರೇಮಕೆ ಅಲ್ಲವೊ ಜಿಪುಣ
ಅವನು ನಮ್ಮನು ತೀಡುವ ರೀತಿ
ಅಮ್ಮನಂತಲ್ಲವು ಅವನದೇ ರೀತಿ

ಅಪ್ಪನು ಇರುವ ಹುಳಿ ಮೊಸರಿನ ಹಾಗೆ
ಅದಕಿದೆ ಹಾಲಿನ ಮೂಲದ ಒಸಗೆ
ಅಪ್ಪನು ತಾ ಎಳೆ ನೀರಿನ ಕಾಯಿ
ಹೊರಗಡೆ ಚಿಪ್ಪು ಒಳ ಸಿಹಿ ಬಾವಿ

’ಈ ಜಗ ಸೋಜಿಗ’ ಅನ್ನುವ ಕವನ ಎಷ್ಟು ಚೆಂದ ನೋಡಿ.

ಸುಂದರ ಸುಂದರ ಸುಂದರ ಈ ಜಗ
ಕಣ್ಣರಳಿಸಿ ನೋಡೋ
ಇದರೊಡಗೂಡಿ ಇದರೊಡನಾಡಿ
ನೀ ನಲಿದಾಡೊ!

ಸಮಯಕೆ ಸರಿಯೆ ಸೂರ್ಯನು ಮೂಡುವ
ಆ ಸೊಗಸನು ನೋಡೋ
ಮುಗಿಲ ರಂಗಿನ ಓಕುಳಿ ಆಟದ
ಸಂತಸವನು ಕೂಡೊ

’ಚಕ್ರ” ಅನ್ನುವ ಕವಿತೆ ಮಕ್ಕಳ ಯೋಚನೆಗಳನ್ನು ಗಹನಕ್ಕೆ ಹಚ್ಚುತ್ತದೆ.

ಸೂರ್ಯ ಚಂದ್ರ ಭೂಮಿ ಗ್ರಹಗಳು
ಇರುವುವು ದುಂಡು ದುಂಡು
ಚಕ್ರವಿರುವ ಯಂತ್ರ ಹುಟ್ಟಿದುವೆ
ಅವುಗಳ ಆಕಾರ ಕಂಡು !

ಕೇವಲ ಚಕ್ರ ಎನ್ನಲಿ ಬೇಡ
ಅವುಗಳು ಅದ್ಭುತ ಯಂತ್ರ
ಇವುಗಳ ಒಳಗೆ ತಾ ಅಡಗಿಹುದು
ಜಗದ ಪ್ರಗತಿಯ ತಂತ್ರ

ಪರೀಕ್ಷೆಯಲ್ಲಿ ನಕಲು ಮಾಡುವ ಬಗೆಗೂ ಅವರಿಂದ ಬೋಧನೆಯುಂಟು:

ನಕಲನು ಮಾಡುತ ಪಾಸಾಗುವುದು
ಮುಂದಿನ ವರ್ಗಕೆ ನೀ ಸಾಗುವುದು
ಸರಿಯಲ್ಲವು ಮಗು ಇಂತಹ ಕೆಲಸ
ಕಠಿಣವಾಗುವುದು ಮುಂದಿನ ದಿವಸ

ಬೆಣಕಲ್ ಜನಿಸಿದ್ದು ಬಾಗಲಕೋಟೆಯಲ್ಲಿ 7 ಮಾರ್ಚ್ 1947ರಲ್ಲಿ. ಆದರೆ, 2017ರಲ್ಲಿ ಹುಟ್ಟಿದ ಮಗುವಿನೊಂದಿಗೂ ಸ್ನೇಹಿಯಾಗುವ ಮುಗ್ಧತೆ ಮತ್ತು ಲವಲವಿಕೆ. ಪದವೀಧರರಾದ ಅವರು ಸರ್ಕಾರೀ ನೌಕರಿಯಲ್ಲಿದ್ದವರು. ಈಗ ಬೆಂಗಳೂರಿನಲ್ಲಿ ತಮ್ಮ ಮಕ್ಕಳೊಂದಿಗೆ ಸುಖೀ ಜೀವನ ಸಾಗಿಸುತ್ತಿದ್ದಾರೆ. ನಲ್ವತ್ತಕ್ಕೂ ಹೆಚ್ಚಿನ ಮಕ್ಕಳ ಪುಸ್ತಕಗಳು ಪ್ರಕಟವಾಗಿವೆ. ಕವನ, ಕತೆ, ರೋಚಕ ಪ್ರಸಂಗಗಳು, ಒಗಟುಗಳು ಹೀಗೆ ಮಕ್ಕಳ ಆಸಕ್ತಿ ತಣಿಸುವ ಬರಹಗಳು ಅವರಿಂದ ರಚನೆಗೊಂಡಿವೆ.

ಬೆಣಕಲ್ ಅನೇಕ ಪುರಸ್ಕಾರಗಳಿಗೆ, ಸನ್ಮಾನಗಳಿಗೆ ಭಾಜನರಾಗಿದ್ದಾರೆ. ಅವರ ’ಅನ್ನ ಜೇನು’ ಕೃತಿಗೆ ರಾಷ್ಟ್ರಕವಿ ಕುವೆಂಪು ಪುರಸ್ಕಾರ, ಹುಬ್ಬಳ್ಳಿ ಮೂರುಸಾವಿರ ಮಠ ಗ್ರಂಥ ಪುರಸ್ಕಾರ ಇತ್ಯಾದಿ. ಇವರ ಅನೇಕ ಕತೆ, ಕವನಗಳು ಕರ್ನಾಟಕದ ಪ್ರಸಿದ್ಧ ಪತ್ರಿಕೆಗಳಲ್ಲಿ 1970ರಿಂದಲೇ ಪ್ರಕಟವಾಗಿವೆ. ಇವರ ಕವನಗಳು ಮಹಾರಾಷ್ಟ್ರ ರಾಜ್ಯ ಕನ್ನಡ ಪ್ರಾಥಮಿಕ ಪುಸ್ತಕಗದಲ್ಲಿ ಮತ್ತು ಕರ್ನಾಟಕದ ಸರ್ವಶಿಕ್ಷಣ ಅಭಿಯಾನದ ಪ್ರಾಥಮಿಕ ಕಲಿಕೆಯ ಪುಸ್ತಕಗಳಲ್ಲಿ ಪಠ್ಯಗಳಾಗಿವೆ. ಕರ್ನಾಟಕ ಸಾಹಿತ್ಯ ಅಕಾಡಮಿ ಇವರ ಹಲವಾರು ಕವನ ಸಂಕಲನಗಳನ್ನು ಪ್ರಕಟಿಸಿದೆ.

ಚೆನ್ನವೀರ ಕಣವಿ, ಎನ್ಕೆ, ಸಿದ್ಧಯ್ಯಪುರಾಣಿಕ, ಜಂಬಣ್ಣ ಅಮರಚಿಂತ ಮುಂತಾದ ಅನೇಕ ಸಾಹಿತಿಗಳು ಬೆಣಕಲ್ಲರ ಶಿಶುಸಾಹಿತ್ಯವನ್ನು ಪ್ರಶಂಸಿಸಿದ್ದಾರೆ. ಚೆನ್ನಣ್ಣ ವಾಲೀಕಾರರು ಶಿಶು ಸಾಹಿತ್ಯದ ಬಗೆಗೆ ತನಗೆ ಉತ್ಸಾಹ ತುಂಬಿದ್ದನ್ನು ಬೆಣಕಲ್ ನೆನೆಯುತ್ತಾರೆ. ಯಾವಾಗಲೂ ಚಟುವಟಿಕೆಯಿಂದಿರುವ, ಸಂಚಾರವನ್ನು ಇಷ್ಟಪಡುವ ಮತ್ತು ಎಡೆಬಿಡದೆ ಸಾಹಿತ್ಯಿಕ ಕಾರ್ಯಕ್ರಮಗಳಲ್ಲಿ ಭಾಗವಹಿಸುವ ಅವರ ಜೀವನ ಶೈಲಿ ಅನುಕರಣೀಯ.

ಮಕ್ಕಳ ದಿನಾಚರಣೆಯ ಸಂದರ್ಭಕ್ಕೆಂದೇ ಅವರು ಅನೇಕ ಕವನ ಮತ್ತು ಕತೆಗಳ ಪುಸ್ತಕಗಳನ್ನು ಓದಲು ಕೊಟ್ಟರು. ನನ್ನ ಗಮನ ಸೆಳೆದ ಕೆಲವು ಕವನದ ಸಾಲುಗಳನ್ನು ಇಲ್ಲಿ ಮತ್ತೆ ಓದೋಣ.

ನಮ್ಮ ಬುದ್ಧಿ ನಮ್ಮ ಕೈಯಲ್ಲಿರಬೇಕು ಅನ್ನುವುದನ್ನು ಎಷ್ಟು ಚೆನ್ನಾಗಿ ಹೇಳಿದ್ದಾರೆ ನೋಡಿ:

ನರಿಯೊಂದು ಮಾಡ ಬಂದರೆ ಉಪದೇಶ
ಮನೆಯ ಕೋಳಿಯೆಡೆ ಗಮನವಿಡು ವಿಶೇಷ !

ನಮ್ಮ ಅಭಿರುಚಿ ಹೇಗಿರಬೇಕು?

ಸಾಹಿತ್ಯ ಸಂಗೀತ ಕಲೆ ಅರಿಯದವನು
ಕೋಡು ಬಾಲ ಇರದ ಪಶುವಂತೆ ಅವನು

ಮಕ್ಕಳು ಮನೆಯಲ್ಲಿ ನಲಿದರೆ:

ಮಗುವಿನ ನಗೆ ಇರಲು ಮನೆಯಲ್ಲಿ
ಬೇರೆ ದೀಪವು ಬೇಕು ಎನಿಸದು ಅಲ್ಲಿ

ಮಾಡಿದ ತಪ್ಪುಗಳ ಬಗೆಗೆ ನಾವು ಹೇಗಿರಬೇಕು ಅನ್ನುವುದರ ಬಗೆಗೆ:

ತಪ್ಪುಗಳ ಒಪ್ಪುತಲಿ ತಿದ್ದಿಕೊಳ್ಳುವವನು
ಬದುಕಿನಲಿ ಯಶವನ್ನು ನಿಜದಿ ಕಾಂಬುವನು

ಸರಳ ಮತ್ತು ಕುತೂಹಲ ಮೂಡಿಸುವ ಬರವಣಿಗೆ ನೀತಿ ಪೂರ್ವಕವಿದ್ದು ಮಕ್ಕಳಲ್ಲಿ ಆತ್ಮವಿಶ್ವಾಸ, ತ್ಯಾಗ, ದೇಶಭಕ್ತಿ, ಹಿರಿಯರಲ್ಲಿ ಗೌರವ, ಶ್ರದ್ಧೆಗಳನ್ನು ಮೂಡಿಸಬೇಕು.. ಇದು ಮಕ್ಕಳ ಸಾಹಿತ್ಯ ಧರ್ಮ ಅನ್ನುತ್ತಾರೆ ಬೆಣಕಲ್. ಇಂದಿನ ಮಕ್ಕಳಿಗೆ ಕನ್ನಡ ಪುಸ್ತಕಗಳ ಅಭಿರುಚಿ ಮತ್ತು ಅಂಥಹ ವಾತಾವರಣ ಸೃಷ್ಟಿಮಾಡಿಕೊಡುವ ಜವಾಬ್ದಾರಿ ಮನೆಯ ಹಿರಿಯರಲ್ಲಿ ಬರಬೇಕೆನ್ನುವುದು ಅವರ ಕಳಕಳಿ.

ಈಗಿನ ಮಕ್ಕಳ ಕುತೂಹಲದ ಪರಿಧಿ ಬಹಳ ದೊಡ್ಡದಿದೆ. ಅವರ ಜಿಜ್ಞಾಸೆಗಳಿಗೆ ಮತ್ತು ಪರಿಷ್ಕೃತ ಅಭಿರುಚಿಗಳಿಗೆ ಸಮಾಧಾನ ಕೊಡುವ ಸಾಹಿತ್ಯ ಸೃಷ್ಟಿಮಾಡುವ ಗುರುತರ ಜವಾಬ್ದಾರಿ ಮಕ್ಕಳ ಸಾಹಿತಿಗಳಿಗಿದೆ ಎಂದು ಅವರ ಅಭಿಪ್ರಾಯ.

ಇತ್ತೀಚೆಗೆ ‘ಭಕ್ತಿ-ಸರಸ’ ಅನ್ನುವ ಅಧ್ಯಾತ್ಮ ಚಿಂತನದ ಕಾವ್ಯ ಕೃಷಿಯಲ್ಲಿ ತೊಡಗಿಕೊಂಡಿದ್ದು, ಸಾಹಿತ್ಯ ಪ್ರಪಂಚದ ನಿರಂತರ ಪಯಣಿಗರಾಗಿದ್ದಾರೆ. ಮಕ್ಕಳಿಗೆ ಮತ್ತಷ್ಟು ಕೃತಿಗಳು ಅವರಿಂದ ರಚನೆಯಾಗಲಿ ಅನ್ನುವ ಆಸೆ. ಕನ್ನಡ ಓದುವ ಮಕ್ಕಳು ನಮ್ಮ ಸಂಸ್ಕೃತಿಯನ್ನರಿವ ಪ್ರತಿಭಾಶಾಲಿಗಳಾಗುತ್ತಾರೆ ಎಂದು ಬೆಣಕಲ್ ನಂಬುತ್ತಾರೆ.

ಅವರ ಕವಿತೆಯೊಂದರ ಸಾಲುಗಳಿಂದಲೇ ಅಭಿವಾದನ ಮಾಡೋಣ.

ಏನಾದರೂ ನೀ ಆಗುವದಿದ್ದರೆ
ಬೆಳಗುವ ಜ್ಯೋತಿಯು ಆಗು
ಸುತ್ತಲು ಹರಡಿಹ ಕತ್ತಲೆಯನ್ನು
ಬೆಳಕಿನ ರೂಪದಿ ನೀಗು

ಬೆಳಗಿ ಬೆಳಗುತ ಆ ರವಿಯಂತೆ
ಸೇವೆಯ ಕಾರ್ಯದಿ ಮಾಗು
ಜಗದಲಿ ಹರಡಿಹ ಹಿರಿತಮವನ್ನು
ರವಿಯ ಬೆಳಕಿನೊಲು ನೀಗು

ಲೇಖಕರೊಂದಿಗೆ

(ಲೇಖಕನೊಂದಿಗೆ ಶ್ರೀ ಗುರುರಾಜ ಬೆಣಕಲ್)

***

(Published in Surahonne e magazine Link: http://surahonne.com/?p=17683)

(Published in kannada.pratilipi e magazine:Link address: https://kannada.pratilipi.com/anantha-ramesh/makkala-saahithya-krushika)