ಸ್ಕೂಲಿಗೆ ಹೋಗುವೆ

(ʼಗುಮ್ಮನ ಕರೆಯದಿರೆʼ ಪ್ರೇರಣೆ
ಪುರಂದರದಾಸರ ಕ್ಷಮೆ ಕೋರಿ)

ಸ್ಕೂಲಿಗೆ ಹೋಗುವೆನೆ ಅಮ್ಮಾ ನಾನು
ಸ್ಕೂಲಿಗೆ ಹೋಗುವೆನೆ
ಸುಮ್ಮನೆ ಕುಳಿತೆನು – ಡುಮ್ಮಗೆ ಆದೆನು
ಇನ್ನು ತಿನ್ನಿಸದಿರು – ಅಮ್ಮ ಹಸಿವೆ ಇಲ್ಲ

ಆನ್‌ಲೈನು ಕ್ಲಾಸಿಗೆ ಹೋದರೆ ನಾನು
ಕಣ್ಣು ಮುಚ್ಚಿ ಮಲಗುವೆ
ಟೀಚರು ಮಾಡುವ ಪಾಠಗಳೆಲ್ಲ
ಅರ್ಥವಾಗದೆ ಮತ್ತೆ ಮರೆತೆನಲ್ಲ

ಆಟದ ಬಯಲಿಗೂ ಲಾಕ್‌ ಡೌನೇನು
ಜಾರುಬಂಡೆ ಮುಚ್ಚಲೇಕೆ
ಗೆಳೆಯರ ಜೊತೆ ಸೇರಿ ಆಡುವುದನು ಬಿಡೆ
ಕೊಕ್ಕೊ ಕ್ರಿಕೆಟ್ಟಿಗೂ ನಾ ಸೇರುವೆ

ಮಗನ ಮಾತನು ಕೇಳುತ ತಾಯಿ
ಮುಗುಳುನಗೆಯ ನಗುತ
ಬೇಗನೆ ಕಂದಗೆ ವ್ಯಾಕ್ಸಿನ್‌ ಸಿಗಲೆಂದು
ಬಿಗಿಯಾಗಿ ಮಾಸ್ಕನು ಕಟ್ಟಿದಳಾಗ

(Pic Courtesy:Google)

ಬುದ್ಧ – ನುಡಿ

ಹಳತನು ಸುಟ್ಟು
ಹೊಸತಿಗೆ ಹುಟ್ಟು 
ಹಾಕಿದ ಕ್ರಾಂತಿಕಾರ

ಹಾದಿಯ ಅರಸು
ನೀನೇ ಗಮಿಸು
ನುಡಿಗಳ ಹರಿಕಾರ

ಶಾಂತಿ ನೆಮ್ಮದಿ 
ಹೃದಯದ ಬೆಳೆ  
ಬಿತ್ತಿದ ಬೆಳೆಗಾರ

ಮೆಟ್ಟುವ ಸೋಲನು
ಮೆಟ್ಟಿಲಾಗಿಸು
ಅಂದ ಧೈರ್ಯದಾತ

ತಿಳಿವಿನ ಸುಧೆಯಲಿ
ತಮಂಧವ ದೂಡಿ
ದಾರಿ ತೋರಿದಾತ 

ಅವಲೋಹ

ವಾಟ್ಸ್ಆ್ಯಪ್ ಮೆಸೇಜು ನೂರು
ಫೇಸ್ಬುಕ್, ಇನ್ ಸ್ಟಾ,  ಕೂ
ಯುವರ್ ಕೋಟ್, ಟ್ವೀಟು
ಬಿಡದೇ ನೋಡು ನೂರಾರು
ಪ್ರೈಮ್ ಟೈಮ್‌,ನೆಟ್ ಫ್ಲಿಕ್ಸ್ 
ಯುಟ್ಯೂಬ್, ಶೇರ್‌ ಚಾಟು
ಪೇಪರ್ ಓದು ಹೆದರು
ಟಿವಿ ನ್ಯೂಸು ಬರೀ ದೂರು
ಧಾರಾವಾಹಿ ಎಳೆ ಐದಾರು
ಗೆಳೆಯರ ಫೋನು ಹತ್ತಾರು
ಸೂರ್ಯ ಎದ್ದು ಮುಳುಗಿ
ದ ಮೇಲೂ ಬೇಕು ತಾಸು ಆರು
ಚಿತ್ತ ಸುದ್ದಿ ಸಂಗ್ರಹ
ಭ್ರಮಣದ ರಣಹದ್ದು

ಇಲ್ಲಿ ವಿನಾ ನಿಂತು
ಸಮಯವಿಲ್ಲವೆನ್ನುವವನು
ಬೆಳಕ ಪುಸ್ತಕಗಳಿಗೆ
ಬೆನ್ನುಹಾಕಿದವನು
ಅವಲೋಕ ಮರೆತವನು
ಪರುಷ ಸ್ಪರ್ಷವಿಲ್ಲದೆ
ಅವಲೋಹವಾಗುಳಿದವನು

ಬಿಕರಿಯಾಗಲಿ ಹೂ

ಹಿಡಿ ಹೂಗಳ
ಹಿಡಿದ ಹುಡುಗಿಗೆ
ಕನಸು ಮಾರುವ ಕೆಲಸ

ಕೊಳ್ಳಲು ಬರುವ
ಜನ ಮನಗಳಲಿ
ವಿಧ ವಿಧಗಳ ಭಾವ

ಹುಡುಗನೊಬ್ಬನಿಗೆ
ಕೊಡಲೇ ಬೇಕಿದೆ ಹೂ
ನಲ್ಲೆ ಕೈಯ ಸೆಳೆದು

ಹುಡುಗಿಯು ನಿಂತು
ಕನಸಿದ್ದಾಳೆ ಇನಿಯ
ಮುಡಿಗೆ ಮುಡಿಸಲೆಂದು

ಗುಡಿಯೆಡೆಗೆ ನಡೆದವನು
ದೇವರಿಗರ್ಪಿಸನೇನು
ಧನ್ಯತೆ ತಾಳನೇನು

ವಿಧುರನೊಬ್ಬನು
ಕೊಂಡು ಹೂಗಳನು
ನೆನಪಲಿ ಮುಳುಗಿಯಾನು

ದಾರಿಹೋಕನು
ಮರುಗಬಹುದು ಬಿಸಿಲಲಿ
ಬಾಡುವ ಎಳೆತನವನು ಕಂಡು

ಬಿಕರಿಯಾದರೆ
ಬಾಲೆ ಕೈಗೆ ಕಾಸು
ನರಳುವ ಅಮ್ಮಅರಳಿದಂತೆ ಕನಸು

(Pic from Google)

                            

ಬಿಟ್ಟರೂ ಬಿಡದವನು

ಪದೇ ಪದೇ ನೆನಪಾಗೋದು
ಅಪ್ಪ ಹೇಳುತ್ತಿದ್ದ ಮಾತು
ʼತಾಳ್ಮೆ ಬೆಳೆಸಿಕೋ ಮಗನೆʼ
ನನಗೋ ಅಸಹನೆ ಅಸಡ್ಡೆ ಮುನಿಸು

ಕೆಲವೊಮ್ಮೆ ಹೇಳುತ್ತಿದ್ದ ತನ್ನ ಸಾಹಸ ಗಾಥೆ
ಸರತಿಯಲ್ಲಿ ನಿಂತು ಪಡೆದ
ರೇಷನ್ಉ ಕಾರ್ಡಿನ ಕತೆ
ಆಧಾರಕ್ಕೂ ಹಳೇ ಕತೆ
ತಿಂಗಳು ತಿಂಗಳಾ ಕಾದು ತರುವ
ಸಬ್ಸಿಡಿಯ ದಿನಸಿ ಮುಗ್ಗುಲು
ಸರಕಾರದ ಬಡವರ ಸ್ಕೀಮುಗಳಿಗೂ
ಅವನ ಸರತಿ ಮಾಮೂಲು
ತಿಂಗಳ ಕೊನೆ ಹಣ ಹೊಂದಿಸಿ ಕಟ್ಟುತ್ತಿದ್ದ
ವಿದ್ಯುತ್‌ ಬಿಲ್ಲು; ಸರತಿ ಅಲ್ಲೂ

ನನ್ನ ಶಾಲೆಗೆ ಆಮೇಲೆ ಕಾಲೇಜಿಗೆ
ಸೇರಿಸುವಾಗ ಕ್ಯೂ ಮರೆಯದ ಮಹಿಮೆ
ಕೂಲಿಗೂ ಅವನ ಫ್ಯಾಕ್ಟರಿಯಲ್ಲಿತ್ತು ಕ್ಯೂ
ಅಬ್ಬಾ, ಯಾರಿಟ್ಟರೋ ಅವನಲ್ಲಿ ತಾಳ್ಮೆ!

ಚಿಕ್ಕವನಿದ್ದಾಗ ಅವನೊಡನೆ
ದೊಡ್ಡ ದೇವಸ್ಥಾನಗಳಲ್ಲಿ ಸರತಿ
ದೊಡ್ಡ ಸ್ವಾಮಿಗಳ ಕಾಲಿಗೆ
ಬೀಳುವಾಗಲೂ ಚಿಕ್ಕ ಸರದಿ
ಪ್ರಸಾದಕ್ಕಂತೂ ಬಿಡದ ಸರತಿ

ನಾನು ದುಡಿಯೋದು ಕಾದಿದ್ದನೇನೋ!?
ನಿವೃತ್ತಿ ಪಡೆದ ಮೊನ್ನೆ ಮೊನ್ನೆ
ಬಫೆಯ ಬೀಳ್ಕೊಡುಗೆ
ಸರತಿ ನಿಂತು ತಟ್ಟೆ ತುಂಬಿಸಿ
ಮನಸ್ಸು ಬಿಚ್ಚಿ ಮಾತು ಹರಿಸಿ
ತಿನ್ನುವಾಗ ಮಾಸ್ಕು ಬಿಚ್ಚಿ ಚಪ್ಪರಿಸಿ

ನಿನ್ನೆ ಜಡ್ಡಾದ
ಕೊಂಡೊಯ್ದಾಗ, ಆಸ್ಪತ್ರೆ ಕ್ಯೂ; ಖುಷಿಯಾದ!
ನನ್ನೊಂದಿಗೇ ಕಾದ ಬೆಡ್ಡಿಗಾಗಿ;
ಆಮೇಲೆ ಓಟೂ(O2)ಗಾಗಿ
ಈಗ ದೇಹ ನನಗೆ ಬಿಟ್ಟು ಹೊರಟುಹೋಗಿದ್ದಾನೆ
ಅಪ್ಪ ನನ್ನ ತಾಳ್ಮೆ ಪರೀಕ್ಷೆಗಿಟ್ಟಿದ್ದಾನೆ
ನಿಲ್ಲಿಸಿ ಚಿತಾಗಾರದ ಕ್ಯೂವಲ್ಲಿ

(Pic:Google)

ಹರಟೆ ಕಟ್ಟೆ

ಸಂಜೆಯತ್ತಲ ತನು
ಲವಲವಿಕೆಯಲಿ ಮನ
ದೂರವೆನಿಸದ
ಆಯಾಸವೆನಿಸದ ನಡಿಗೆ
ಅಲ್ಲಲ್ಲಿ ಬಿರುಕು
ಸಿಮೆಂಟುದುರಿದ
ಕೆಂಬಣ್ಣದಿಟ್ಟಿಗೆಯ
ಕಾಲಿಳಿಬಿಟ್ಟು ಹರಟೆ
ಗೆ ಪಕ್ಕಾದ ಪಟ್ಟಾಂಗ ಕಟ್ಟೆ

ದಿವಸಗಳ ದವಸ
ಹೊತ್ತ ಬಂಡಿಯವರು
ಸುದ್ದಿಗಳ ಕೊಡಕೊಳ್ಳುವವರು
ಬದಲಾದ ಸಂತೆ ಬೀದಿಗೆ
ದೂರುತ್ತಾ ಆಗಾಗ ನಿಟ್ಟುಸಿರು
ಪುಕ್ಕಟೆ ಪುರಾಣದವರು

ಲಲನೆಯರ ನಗೆಯಿಂದ
ಅಜ್ಜಿಅಳುವರೆಗೆ
ಉಂಡೆಗಟ್ಟಿದ ನೂಲ
ಗೋಜಲಿಲ್ಲದ ಬ್ರಹ್ಮಗಂಟು
ಬಿಡಿಸಿ ನೋಡುವ ತರಲೆ
ರಹಸ್ಯ ಜಾಲ ಭೇದಿಸಿದ
ಗಟ್ಟಿ ಟೊಳ್ಳು ಡೊಳ್ಳು ಹೊಟ್ಟೆ
ಕಾಯದವರ ಲೀಲೆ!

ಮಡದಿ ಹಂಗಿಸಿದ ಮುಖ
ಮಕ್ಕಳಾಡಿದ ವ್ಯಂಗ್ಯ
ಎದುರು ಮನೆ ಮಾನವರ
ನಿರ್ಭಾವ‌ ಮುಖ ಮರೆತು
ಮಿಕ್ಕಿರುವ ಇವರಲ್ಲೆ ಮೆರೆವ
ಅಟ್ಟಹಾಸದ ತವಕ

ಆಗುಹೋಗುಗಳ ಗೊಡವೆ
ಹಾದುಹೋಗುವವರ ನಡುವೆ
ಕೆದಕು ಕುತೂಹಲ
ಅರ್ಧ ಲೋಟದ ಕಾಫಿ
ಸುರುಳಿ ಸಿಗರೇಟು ಹೊಗೆಗೆ
ಸಹಸ್ರಾರಕ್ಕೆ ಚಿಟಿಕೆ ನಶ್ಯ
ದ ಘಾಟು, ಕಟ್ಟೆ ಪಕ್ಕದ ಖುಲ್ಲ
ಹೋಟೆಲ್ಲು ಗಲ್ಲದ ಮೇಲೋಬ್ಬರು
ತಂಬಾಕು ಮೆಲ್ಲುತ್ತಾ
ನೋಟಿಗೆ ಚಿಲ್ಲರೆ ಕೊಡುವವರು

ನಿರಾಶೆ ಮಳೆಗೆ ಕೊಡೆಹಿಡಿದು
ಹೆಜ್ಜೆ ಹಗುರಾಗಿಸುವ
ರಾಡಿ ತಿಳಿಯಾಗಿಸುವ
ಮೆಟ್ಟಲಿರುವ ವೈರಾಗ್ಯ ಅಟ್ಟುವ
ರಾತ್ರಿ ನಿದ್ರೆಗೆ ಉಪಾಯಗಳ
ಆವಿಷ್ಕಾರದ ಮಗ್ಗುಲು ಬದಲಿಸುವ
ಕಳೆವ ಲೆಕ್ಕದವರು ಕಲೆವ
ಬೀಳ್ಕೊಡುಗೆಯಲಿ ನಾಳೆಯ
ಆಸೆ ಹೊತ್ತಿಸುವ ಸೋಮಾರಿ ಕಟ್ಟೆ

(Published in:https://panjumagazine.com/?p=17629}

ಹೊರಟ ‘ಸಪಬ’

ಪಿಬಿ ಎಸ್, ಎಸ್ ಪಿಬಿ
ಪಬಸ, ಸಪಬ
ಮೂರೇ ಅಕ್ಷರ 
ಮೂರು ಸ್ವರ
ಸಿಕ್ಕಿದರಿಬ್ಬರು ಕನ್ನಡಕೆ
ಹೊಕ್ಕರು ಎಲ್ಲರ ಮಾನಸಕೆ

ಗಾನದಿ ತಣಿಸಿದ
‘ಸಪಬ’ ಹೊರಟಿತೆ
ನಮ್ಮ ತೊರೆದು ಇಂದು
ಅವಸರವೇಕೋ
ಬಯಸಿತು ಏಕೋ
ನಮ್ಮೆಲ್ಲರ ಅಶ್ರು ಬಿಂದು

(Pic from Google)

ಕೊಳಲು ಸಿಕ್ಕಮೇಲೆ…

ಅಮ್ಮ ಬಾ ಅಪ್ಪ ಬಾ
ಅಜ್ಜ ಅಜ್ಜಿ ಬನ್ನಿರಿ
ಕೃಷ್ಣನಂತೆ ಕಾಣಲು ನಾ
ಗೆಜ್ಜೆಗಳ ಕಟ್ಟಿರಿ

ಹಣೆಗೆ ತಿಲಕ ಕೊರಳ ಹಾರ
ಉಡಿಸಿ  ಪೀತಾಂಬರ
ತಲೆಗೆ ಪುಟ್ಟ ನವಿಲುಗರಿ
ಕೈಗೆ ಇರಲಿ ಮುರಳಿ

ಬೆಟ್ಟ ಎತ್ತಲೇಕೆ ನಾನು
ನನ್ನೆ ಎತ್ತಿಕೊಳ್ಳಿರಿ
ಬೆಣ್ಣೆ ಕೊಡಿ ತಿನ್ನಲು
ಹೋಗೆ ಮಣ್ಣಲಾಡಲು

ತನ್ನಿ ಉಂಡೆ ಚಕ್ಕುಲಿ
ಕುಡಿಯ ಕೊಡಿ ಪಾಯಸ
ಹೊರಡಬೇಕು ಆಟಕೆ
ಬಹಳವಿದೆ ಸಾಹಸ

ಇಂದು ಕೃಷ್ಣನಾದೆನು
ತಂಟೆ ಇನ್ನು ಮಾಡೆನು
ಕೊಳಲು ಸಿಕ್ಕ ಮೇಲೆ
ಸಂಗೀತದಲ್ಲೆ ಉಲಿವೆನು

ಆಗಾಗ ಬಾ

ಮಕ್ಕಳಿಗೆ ಹುಟ್ಟುಹಬ್ಬ
ಪ್ರತಿ ತಿಂಗಳೂ ಮಾಡಿ
ಬೇಡವೆನ್ನರು
ತಿನ್ನಲೆಷ್ಟೇ ಕೊಡಿ
ಸಾಕೆನ್ನರು!
ಹಾಗೆಯೇ ಬಾಲಕೃಷ್ಣ
ಪಂಚಾಂಗ ಪಂಡಿತರ
ತರ್ಕಹೂಡಲು ಬಿಟ್ಟು
ಅಷ್ಟಮಿಗೆ ಇಷ್ಟದಲೊಮ್ಮೆ
ರೋಹಿಣಿಗೆ ಮಿನುಗಲೊಮ್ಮೆ
ನೆಪಹೂಡಿ ಬರುವ ಬಲುಮೆ!

ಜನ್ಮದಿನ ಆಗಾಗ ಬರಲಿ
ಉಂಡೆ ಚಕ್ಕುಲಿ ಬೆಣ್ಣೆ ಕಡುಬಲಿ
ಬೆಂದ ಪ್ರೀತಿ ಕೃಷ್ಣ ಕಾಣಲಿ
ಆಗಾಗ ಬಂದು ನಮ್ಮೊಳಗೆ ನಿಂದು
ಕಷ್ಟ ಪರಿಹರಿಸಲಿ
ಕ್ಲಿಷ್ಟದಿನ ಮರೆಯಿಸಿ
ಮನಸ ನಲಿಸಲಿ

ರಾಮ ಬರುವುದೇ ಹೀಗೆ

ಭರತ ವರ್ಷದ ತುಂಬು
ಹರ್ಷ ಭಾವ
ಕತ್ತಲೆ ಮುಗಿಯಿತು
ಈಗ ಬೆಳಕಿನ ವಿಭವ

ನಮ್ಮ ನಾವು ಮರೆತು
ನೆಲದ ಪ್ರಜ್ಞೆ ಸರಿದು
ಪೂರ್ವಜರ ನಗೆಯಾಡಿ
ವ್ಯಂಗ್ಯಿಸಿ ಹಗೆ ಹೂಡಿ
ದಾಸ್ಯದುರಿಯ ಸುಡು
ಸಹಿಸುವವರಲ್ಲಿ
ಮಂದಿರದ ನೆನಪ ಬಿಲ್ಲ
ಹೂಡಿ ಬಿಟ್ಟ ಬಾಣ, ರಾಮ
ಆಸೇತು ಹಿಮಾಚಲ
ನಿದ್ರೆ ಹರಿಸಿದ ಲಲಾಮ

ಅಪಸ್ವರಗಳು ಅಡಗಿ
ಏಕತೆಯ ಮಂತ್ರಕ್ಕೆ ಇಂದೇ
ಭರತ ಬಂದಿತು ಮೊಳಗೆ
ಶತ ಶತಮಾನಗಳ ಕಳಂಕ
ಸರಯೂ ತೊಳೆವ ಹಾಗೆ
ʼಯದಾಯದಾಹಿʼ
ಧರ್ಮ ಗ್ಲಾನಿಯೊ, ತಡೆಗೆ
ರಾಮ ಬರುವುದೇ ಹೀಗೆ !