ಮತ್ತೆ ಶಾಲೆಗೆ?



ಶಾಲೆ ನಮಗೆ ಬೇಕಮ್ಮ? ಶಾಲೆ ಮುಚ್ಚಿದ್ದೇಕೆ?
ಆಟ ಪಾಠ ಬೇಕಮ್ಮ, ಸೂರ್ಯನ ಬೆಳಕಿನ ಜೊತೆಗೆ


ದೊಡ್ಡ ಕಟ್ಟಡವಂತೆ, ಅಲ್ಲಿ ಸಣ್ಣ ತರಗತಿಯಂತೆ
ಗೆಳೆಯ ಗೆಳತಿಯರೆಲ್ಲ ಸೇರಿ ಒಟ್ಟಿಗೆ ಕೂಡುವುದಂತೆ


ಶಾಲೆ ನಮಗೆ ಬೇಕಮ್ಮ…


ಯೂನಿಫಾರಂ ಜೊತೆಗೆ ಬೆನ್ನಿಗೆ ಬ್ಯಾಗು ಜೀಕಿ
ಹೊಳೆಯೊ ಶೂ ಹಾಕಿ,ಟಪ್ಟಪ್ ನಡೆಯೋಶೋಕಿ


ಶಾಲೆ ನಮಗೆ ಬೇಕಮ್ಮ…


ಕಪ್ಪು ಬೋರ್ಡಿನ ಮುಂದೆ ,ಪಾಠ ಮಾಡ್ತಾರಂತೆ
ತಪ್ಪು ಮಾಡೊ ಮಕ್ಕಳ ತಿದ್ದಿ ಬುದ್ಧಿ ಹೇಳ್ತಾರಂತೆ


ಶಾಲೆ ನಮಗೆ ಬೇಕಮ್ಮ…


ಶಾಲೆಯ ಎದುರಿನಲ್ಲಿ, ದೊಡ್ಡ ಆಟದ ಬಯಲು
ಪ್ರಾರ್ಥನೆ ಮಾಡು ಮೊದಲು, ಸಂಜೆ
ಆಟ ಆಡು

ಶಾಲೆ ನಮಗೆ ಬೇಕಮ್ಮ…


ಹೆಡ್ ಮಿಸ್ಸು ಜೊತೆಗೆ, ಟೀಚರು ಬೇಕು ನಮಗೆ
ಆಟ ಪಾಠ ಸ್ನೇಹದಲ್ಲಿ ಸ್ವರ್ಗ ಸಿಕ್ಕ ಹಾಗೆ


ಶಾಲೆ ನಮಗೆ ಬೇಕಮ್ಮ…


ಈಗಿನ ಆನ್ಲೈನ್ ಕ್ಲಾಸು, ಬೇಗ ಮುಗಿಯಲ್ವೇನು?
ಲ್ಯಾಪ್ ಟಾಪ್ ಪಾಠ ಸಾಕು, ಪುಸ್ತಕ ಬ್ಯಾಗು ಬೇಕು


ಶಾಲೆ ನಮಗೆ ಬೇಕಮ್ಮ…

ಬಚ್ಚಿಟ್ಟ ಮಕ್ಕಳ ಪದ್ಯಗಳು

20200219_210352_2

ಹಳೆಯ ನೋಟ್ ಪುಸ್ತಕದಲ್ಲಿ ಬಚ್ಚಿಟ್ಟ ಎಳೆಯ ಪದ್ಯಗಳ ಕಥೆ.

ಸುಮಾರು ೪ ದಶಕಗಳಿಂದ ಹಳೆಯ ಮೂರು-ನಾಲ್ಕು ಸೂಟ್ಕೇಸುಗಳು ನನ್ನ ಅಂಟಿಕೊಂಡಿದ್ದುವು. ನಾನು ಹೋದ ಊರುಗಳಿಗೆಲ್ಲ ಅವುಗಳದೂ ಪ್ರಯಾಣ. ವಿಚಿತ್ರವೆಂದರೆ ಅವನ್ನು ಯಾವತ್ತೂ ತೆರೆದು ನೋಡದಿರುವುದು. ಮನೆಯಲ್ಲಿ ಯಾರಾದರೊಬ್ಬರು ಒಮ್ಮೊಮ್ಮೆ ಅವನ್ನು ತೆರೆದದ್ದಿದೆ. ಒಂದಷ್ಟು ಹಳೆಯ ನೋಟ್ ಪುಸ್ತಕಗಳು ಅವು. ಅದರಲ್ಲಿದ್ದುದೆಲ್ಲ ಯಾವುದೋ ಗತಕಾಲದ ಕುರುಹುಗಳಂತೆ ಕಾಣುತ್ತಿದ್ದ ಕಾರಣ ಅವನ್ನೆಲ್ಲ ತೆರೆದು ನೋಡುವ ಮನಸ್ಸು ಮನೆಯವರಾರೂ ಮಾಡಿರಲಿಲ್ಲ.

ಮೊನ್ನೆ ಹಳೆಯ ಕೊಳೆಯ ಸೂಟ್ಕೇಸುಗಳನ್ನು ಬಿಬಿಎಂಪಿಯವರ ಕಸ ಸಂಗ್ರಹಕ್ಕೆ ಹಾಕಿಬಿಡುವ ಆಲೋಚನೆ ಬಂದಿದ್ದೇ ಮೇಲಿದ್ದದ್ದನ್ನೆಲ್ಲ ತೆಗೆದೆ. ಧೂಳು ಝಾಡಿಸಿ ಸೂಟ್ಕೇಸ್ ತೆರೆದೆ. ನೋಟ್ ಪುಸ್ತಕಗಳು ವಿಚಿತ್ರ ಬಣ್ಣಗಳಲ್ಲಿ ಕಾಣಿಸದವು. ಪುಟಗಳನ್ನು ತೆರೆದಂತೆ ನನ್ನ ಬಾಲಿಶ ಬರಹಗಳು ಗೀಚು ರೂಪದಲ್ಲಿ ಅಣಕಿಸಿದವು. ಸಧ್ಯ, ಮನೆಯವರು ಯಾರೂ ಇವನ್ನು ನೋಡದೆ ಮರ್ಯಾದೆ ಉಳಿಯಿತು ಅಂದುಕೊಂಡೆ. ಆಗ ಸಿಕ್ಕಿದ್ದು ನಾಲ್ಕು ಪತ್ರಿಕೆಯ ತುಣುಕುಗಳು. ನನ್ನ ೬ ಮತ್ತು ೭ ನೇ ತರಗತಿಯ ದಿನಗಳಲ್ಲಿ ಧೈರ್ಯ ಮಾಡಿ ಬರೆದು, ಪ್ರಜಾವಾಣಿ, ಸಂಯುಕ್ತ ಕರ್ನಾಟಕಕ್ಕೆ ಕಳುಹಿಸಿದ್ದ ಎಳೆಯ(ರ) ಪದ್ಯಗಳು ಅವು! ೪೫ ವರ್ಷಗಳಿಗೂ ಮೊದಲು ಪತ್ರಿಕೆಗಳಲ್ಲಿ ಪ್ರಕಟವಾದ ಕೆಲ ಪದ್ಯ ಈ ಬ್ಲಾಗಲ್ಲಿ ಹಾಕುವ ಆಸೆಯಾಯಿತು. (ಮಕ್ಕಳ ದೇವರು ಪದ್ಯ ಈಗ ಸ್ವಲ್ಪ ತಿದ್ದಿದ್ದೇನೆ) ನನ್ನ ಹೆಸರಿನಡಿ ’ಗುಬ್ಬಿ’ ಅನ್ನುವುದನ್ನು ಓದಿ, ಗುಬ್ಬಿಯ ಹೈಸ್ಕೂಲಿನಲ್ಲಿ ಉಪಾಧ್ಯಾಯರಾಗಿದ್ದ ಸಾಹಿತಿ ದಿ.ಕಡೂರು ರಾಮಸ್ವಾಮಿ ಯಾರನ್ನೋ ವಿಚಾರಿಸಿ ಮಿಡಲ್ ಸ್ಕೂಲಿನಲ್ಲಿದ್ದ ನನ್ನನ್ನು ’ಯಾರಿವನು?’ ಅಂತ ಕುತೂಹಲದಿಂದ ನೋಡಲು ಬಯಸಿ ಯಾರಮೂಲಕವೊ ಕರೆಸಿದ್ದು ನೆನಪಾಯಿತು!

ಅವರು ಅಭಿಮಾನದಿಂದ ನನ್ನನ್ನು ನೋಡಿದ್ದು, ನಾನು ಸಂಕೋಚದ ಮುದ್ದೆಯಾಗಿ ಅವರಿಗೆ ನಮಸ್ಕಾರವನ್ನೂ ಮಾಡದಿದ್ದದ್ದ್ರು ನೆನಪಾಗುತ್ತಿದೆ!

ಅಚ್ಚರಿಯೆಂದರೆ, ಇತ್ತೀಚೆಗೆ ಮಕ್ಕಳ ಕವನ ಮತ್ತು ಕತೆಗಳನ್ನು ಬರೆಯುವ ಹಳೆ ಚಾಳಿ ಮರುಕಳಿಸಿದೆ!

ಹಳೆಯ ನೆನಪನ್ನು ಇಂದು ಬ್ಲಾಗಿನಲ್ಲಿ ಹಾಕಿ ಮತ್ತೆ ಎಳೆಯನಾಗುವ ತವಕ!

ಜೈ ಭಾರತಾಂಬೆ

ಪಡೆದಿಹೆವು ಸ್ವಾತಂತ್ರ್ಯ
ತೊಡೆದಿಹೆವು ಪರತಂತ್ರ
ನಾವಿಂದು ಸ್ವತಂತ್ರ
ಜೈ ಭಾರತಾಂಬೆ//

ನಾಡಿನಾ ಪ್ರಜೆಗಳು
ನಾವೆಲ್ಲ ಮುಂದೆ
ನಾಡಿನಾ ರಕ್ಷಕರು
ನಾವೆಲ್ಲ ಒಂದೆ
ಜೈ ಭಾರತಾಂಬೆ//

ಗಾಂಧಿ ಬುದ್ಧರ ನಾಡು
ಅತಿ ಪವಿತ್ರ
ದೇಶ ಸೇವೆಗೆ ನಾವು
ಪೂರ್ಣ ಸ್ವತಂತ್ರ
ಜೈ ಭಾರತಾಂಬೆ//

(ಪ್ರ.ವಾ)
ಭರತ ಕಲಿಗಳು

ಭಾರತ ಮಾತೆಯ ಪುತ್ರರು ನಾವು
ಎಂತಹ ಪುಣ್ಯ ಶಾಲಿಗಳು//

ಪವಿತ್ರ ಭೂಮಿಲಿ ಜನಿಸಿಹ ನಾವು
ದೇಹವ ದಣಿಸಿ ದುಡಿಯುವೆವು
ಹೆಮ್ಮೆಯ ನಾಡಲಿ ಪುಟ್ಟಿಹ ನಾವು
ಧನ್ಯತೆ ಪಡೆಯಲು ಶ್ರಮಿಸುವೆವು //೧//

ಸ್ವಾತಂತ್ರ್ಯಕ್ಕಾಗಿ ಹೋರಾಡಿದವರ
ಮರೆಯದೆ ಮನಸಲಿ ನಮಿಸುವೆವು
ಸ್ವಾತಂತ್ರ್ಯ ಕಲಿಗಳ ನೆನಪಿನ ಸ್ಪೂರ್ತಿಲಿ
ನವ ಭಾರತವನು ರಕ್ಷಿಪೆವು //೨//

ದೇಹದ ಹಂಗನು ದೂರ ತೊರೆದು
ದೇಶದುನ್ನತಿಗೆ ದುಡಿಯುವೆವು
ಸ್ವತಂತ್ರ ನಾಡಲಿ ಜೀವಿಸಿ ನಾವು
ಸ್ವಾರ್ಥ ವಂಚನೆಯ ತೊರೆಯುವೆವು //೩//

ಶಾಂತಿ ಅಹಿಂಸೆಯ ದೇಶವಿದೆನ್ನುವ
ಅರಿವನು ಜಗಕೆ ತೋರುವೆವು
ವೀರ ಹುತಾತ್ಮರು ನಡೆದ ದಾರಿಯಲಿ
ಹೆಜ್ಜೆಯನಿಕ್ಕುತ ನಡೆಯುವೆವು //೪//

(ಸಂ.ಕ)
ಮಕ್ಕಳ ಮನದಲಿ ನೆಹರೂ

ಚಾಚಾ ನೆಹರು ಎಲ್ಲಿಹರು?
ಮಕ್ಕಳ ಮನದಲಿ ನೆಲೆಸಿಹರು/

ಮಕ್ಕಳ ಮೆಚ್ಚಿನ ಚಾಚಾ ನೆಹರು
ಎಳೆಯರ ಬಳಗದ ಮುದ್ದಿನ ನೆಹರು
ಬಾಲರ ಗುಂಪಿನ ಪ್ರೀತಿಯ ನೆಹರು

ಮಕ್ಕಳ ಬಿಟ್ಟು ಅವರೆಲ್ಲಿಹರು
ಮಕ್ಕಳ ಮನದಲಿ ನೆಲೆಸಿಹರು//೧//

ಶಾಂತಿದೂತನೆನಿಸಿದ ನೆಹರು
ಭಾರತ ಮಾತೆಯ ಹೆಮ್ಮೆಯ ನೆಹರು
ಗಾಂಧೀಜಿ ಮೆಚ್ಚಿದ ಆ ನೆಹರು

ಮಕ್ಕಳಿಗೆಲ್ಲ ಅವರೆಲ್ಲಿಹರು
ಮಕ್ಕಳ ಮನದಲಿ ನೆಲೆಸಿಹರು//೨//

ಮಕ್ಕಳೆ ಮುಂದೆ ಪ್ರಭು ಎಂದವರು
ಮಕ್ಕಳೊಡನೆ ನಲಿದಾಡಿದ ನೆಹರು
ಮಕ್ಕಳ ಒಳಿತಿಗೆ ದುಡಿದಂಥವರು

ಮಕ್ಕಳ ಬಿಟ್ಟು ಅವರೆಲ್ಲಿಹರು
ಮಕ್ಕಳ ಮನದಲಿ ನೆಲೆಸಿಹರು//೩//

(ಪ್ರ.ವಾ)

 

ಉದಯ ರವಿ

ಮೂಡಣ ದಿಕ್ಕಲಿ
ಹೊಂಬಣ್ಣವ ಚೆಲ್ಲಿ
ಮೆಲ್ಲನೆ ಮೇಲೇರುತಿಹ
ಉದಯ ರವಿ//

ಹಕ್ಕಿಗಳ ನಾದದಲಿ
ಮೈಮರೆತು ನಿದ್ರೆಯಲಿ
ವಿಶ್ವವನು ನೋಡಲೆಂದು
ಮೆಲ್ಲನೆ ಮೇಲೇರುತಿಹ
ಉದಯ ರವಿ//೧//

ಪೂರ್ವ ಬೆಟ್ಟದ ಸಾಲಲಿ
ಕೆಂಪು ಕಿರಣ ಬೀರುತಲಿ
ಜಗದ ಕಾರ್ಯವ ನೋಡಲೆಂದು
ಮೆಲ್ಲನೆ ಮೇಲೇರುತಿಹ
ಉದಯ ರವಿ//೨//

ಬಾಳ ಬೆಳಗಿಸಲು
ಭುವಿಯ ಪ್ರಕಾಶಿಸಲು
ಕತ್ತಲೆಯು ಓಡುವುದ ನೋಡಲೆಂದು
ಮೆಲ್ಲನೆ ಮೇಲೇರುತಿಹ
ಉದಯ ರವಿ//೩//

(ಪ್ರ.ವಾ)

 

ಮಗುವಿನ ದೇವರು

“ಅಮ್ಮಾ… ಅಮ್ಮ…”

“ಏನು ಮಗು?”

“ಒಂದೇ ಪ್ರಶ್ನೆ”

“ಕೇಳು ಮಗು”

“ದೇವರು ಎಂದರೆ ಯಾರಮ್ಮ?”

“ದೇವರೆಂದರೆ ದೊಡ್ಡವನು
ಒಳ್ಳೆಯ ಬುದ್ಧಿಯ ಕೊಡುವವನು
ಎಲ್ಲರ ರಕ್ಷಣೆ ಮಾಡುವನು”

“ದೇವರೆಲ್ಲಿ ಇರುವನು ಅಮ್ಮ?”

“ಮಂದಿರ ಮನೆ ಶಾಲೆಗಳಲ್ಲಿ
ಸತ್ಯ ಕರುಣೆ ಉಪಕಾರಿಗಳಲ್ಲಿ
ಎಲ್ಲ ಒಳ್ಳೆ ಮನಸುಗಳಲ್ಲಿ”

“ಅಮ್ಮಾ…ಅಮ್ಮ…”

“ಹೇಳು ಮಗು”

“ನನ್ನ ದೇವರು ಬೇರೆಯದಮ್ಮ”

“ಯಾರು ಮಗು?”

“ಆ ದೇವರ ನಾನು ಕಂಡಿಹೆನಮ್ಮ”

“ಹೌದೆ ಮಗು? ಎಲ್ಲಿ ಮಗು?”

“ಒಳ್ಳೆ ದಾರಿಲಿ ನಡೆಸುವ
ಸಕ್ಕರೆ ಮಾತನ್ನಾಡುವ
ಅಕ್ಕರೆಯಿಂದ ನೋಡುವ
ತೆಕ್ಕೆಯಲೆನ್ನ ಸಲಹುವ
ದೇವರೆಂದರೆ ನೀನಮ್ಮ
ನನ್ನ ದೇವರು ನೀನಮ್ಮ!”

(ಪ್ರ.ವಾ) ತಿದ್ದಿದ್ದೇನೆ!
ಪತ್ರಿಕೆಯ ತುಣುಕುಗಳಂತೆ, ಚದುರಿಹೋಗದಂತೆ
ನೆನಪು ಆಗಾಗ ಮರುಕಳಿಸಲೆಂಬ ಆಸೆಯಿಂದೆ ಬ್ಲಾಗಿಸಿದ್ದೇನೆ.
ಎಳೆಯ ಪದ್ಯಗಳು ಬೆನ್ನ ಬಿಡದೆ ಬಾಲ್ಯ ಹೊಳೆಯಿಸುವಂಥವು.

ಇಲಿ ಮತ್ತು ಅಳಿಲು

vv1

ನೆಲದ ಬಿಲವು
ಇಲಿಯ ಮನೆ
ಮರದ ಪೊಟರೆ
ಅಳಿಲ ಕೋಣೆ

ಇಲಿಯ ಓಟ
ನೆಲದ ಮೇಲೆ
ಅಳಿಲ ಆಟ
ಮರದ ಮೇಲೆ

ಇಲಿಯ ಬಾಲ
ಬಹಳ ಸಪೂರ
ಅಳಿಲ ಬಾಲ
ಸ್ವಲ್ಪ ತೋರ

ಇಲಿಯ ಬೆನ್ನು
ಬರಿದೆ ನುಣುಪು
ಅಳಿಲಿಗೆ ಮೂರು
ಗೆರೆಗಳ ಹೊಳಪು

ಇಲಿ ಹಲ್ಲಲ್ಲಿ
ಸಿಕ್ಕಿದ್ದು ಕಚ್ಚುವ
ಅಳಿಲು ಮರದ
ಹಣ್ಣು ಮೆಲ್ಲುವ

ಇಲಿಗು ಅಳಿಲಿಗು
ಹಲ್ಲುಗಳು ಚೂಪು
ಎರಡರ ಓಟವೂ
ಬಹಳವೆ ಚುರುಕು

(ವಿಶ್ವವಾಣಿ – ವಿರಾಮದ ಮಕ್ಕಳ ಪುಟದಲ್ಲಿ ಪ್ರಕಟ ತಾ.೧೩.೦೫.೨೦೧೮)

ನೆಡು ಸಸಿ ಗಿಡ

ಪುಟ್ಟನ ಪ್ರಶ್ನೆ:

ಹೊರಗಡೆ ಏತಕ್ಕೆ ಅಷ್ಟೊಂದು ಬಿಸಿಲು?
ಸುಡುತಿದೆ ನಮ್ಮಯ ತಲೆ ಕೈ ಕಾಲು

ಸೂರ್ಯನಿಗೇತಕೆ ಬಂದಿದೆ ಕೋಪ?
ಕೊಡುವನು ನಮಗೆ ಬಹಳವೆ ತಾಪ

ಏನು ತಪ್ಪನು ಮಾಡಿದೆವೆಂದು
ಬೆವರಲ್ಲಿ ಎಲ್ಲರ ತೋಯಿಸುತಿರುವನು?

ಅಪ್ಪನ ಉತ್ತರ:

ಬೆಟ್ಟ ಗುಡ್ಡ ನದಿ ಕಾಡುಗಳನ್ನು
ಮಾನವ ಸುಮ್ಮನೆ ಬಿಟ್ಟಿಹನೇನು ?

ತನ್ನ ಸ್ವಾರ್ಥಕೆ ಅವೆಲ್ಲವುಗಳನ್ನು
ಹಾಳು ಮಾಡಿ ಮೆರೆಯುತಲಿರುವನು

ಸಸಿ ಗಿಡ ನೆಡದೆ ಮರ ಟಿಸಿಲೊಡೆಯದೆ
ಹಸಿರಿಲ್ಲದೆ ಭೂಮಿ ಒಣಗುವುದಿನ್ನೂ

ತಂಪಿಲ್ಲದ ಕಡೆ ಮೋಡ ಬಾರದು ಬಳಿ
ಒಣ ಭೂಮಿಗೆ ಮಳೆ ಸುರಿಯದು ತಿಳಿ

ನೀರನು ಉಳಿಸಿ ಸಸಿಗಳ ಬೆಳೆಸುವ
ಸ್ವಾರ್ಥವ ಸರಿಸಿ ಭೂಮಿಯ ಉಳಿಸುವ

(ವಿಶ್ವವಾಣಿ – ವಿರಾಮ ೨೧.೦೫.೨೦೧೭ ಸಂಚಿಕೆ)

ಬೇಸಿಗೆ ಹುಷಾರು

vvani

ಹಕ್ಕಿಗಳೆ
ಸ್ವಲ್ಪ ಹುಷಾರು
ಸೂರ್ಯನ ತಾಪ ಜೋರು

ಇರುವೆ
ಬರದಿರು ಹೊರಗೆ
ಬಿಸಿಲಿಗೆ ಸುಮ್ಮನೆ ಒಣಗುವೆ

ಅಳಿಲೆ
ಸುಮ್ಮನೆ ಓಡದಿರು
ಮರಗಳ ಬಿಟ್ಟು ಆಡದಿರು

ಬೆಕ್ಕೆ
ನಿನಗೇತಕೆ ಸೊಕ್ಕೆ
ಬಿಸಿಲಿಗೆ ಬಾರದೆ ಬೊಕ್ಕೆ

ನಾಯಿಮರಿ
ತುಂಬಾ ಬೊಗಳಿ
ಬಾಯಾರಿ ಮಾಡಿಕೊಬೇಡ ಕಿರಿಕಿರಿ

ಕರಿಮೋಡಗಳೆ
ಮಳೆ ಹನಿಗಳೆ
ಬನ್ನಿರಿ ಹೊರಗೆ ತಣಿಸಿರಿ ಎಲ್ಲರ ಬೇಗೆ

(Vishwavani – Virama post -Lollypop dt 09.04.2017)

ತಂಗಿಯ ಕಾರುಬಾರು

IMG_6695

ಅತ್ತ ಇತ್ತ ಹೊರಳಿಸಿ ಕಣ್ಣು
ಎಡ ಬಲಕೆ ಆಡಿಸಿ ತಲೆಯನು
ಮೇಲೆ ಕೆಳಗೆ ಬೀಸುತ ಕಾಲನು
ಎತ್ತಿಕೊಳ್ಳಿ ಬನ್ನಿರಿ ಎಂದು
ಲಲ್ಲೆಗರೆದು ಹಾರುತ್ತಾಳೆ
ಬೆನ್ನ ಏರಿ ನಗುತ್ತಾಳೆ
ನನ್ನ ತಂಗಿ ಚತುರೆ!

ಊಟವೆಂದರೆ ದೂರಕೆ ಓಡಿ
ಆಟಿಕೆಗಳನು ಆಚೆಗೆ ದೂಡಿ
ಕಣ್ಣು ತಪ್ಪಿಸಿ ಹೊರಕ್ಕೆ ತೆವಳಿ
ನಾಯಿ ಬೆಕ್ಕು ಹಸುಗಳನೆಲ್ಲ
ಕೈಯನು ತಟ್ಟಿ ಕರೆಯುತ್ತಾಳೆ
ಹಾರಿ ಹಾರಿ ನಲಿಯುತ್ತಾಳೆ
ತಂಗಿ ಸ್ವಲ್ಪವೆ ತರಲೆ!

ಬೇಡ ಬೇಡ ಅಂದರೆ
ಬೇಕೇ ಬೇಕು ಎನ್ನುವ ಹಠವೆ
ಆಡಲು ಬರುವೆಯ ಕೇಳಿದರೆ
ಬಂದಿತು ಮೆಲ್ಲಗೆ ನಿದಿರೆ
ಎಚ್ಚರಾಗಿ ಅಳುವಳು ಹಸಿವಿಗೆ
ಹಾಲು ಕುಡಿದಾದರೆ ಹೂನಗೆ
ಆಟಕೆ ಸ್ಪೂರ್ತಿ ನಮಗದುವೆ !

ಮೊಗ್ಗು ಮೂಗು ಕಪ್ಪು ಹುಬ್ಬು
ಚೂಪು ಕಿವಿ ಕೆಂಪು ಕೆನ್ನೆ
ಮುದ್ದು ಮುಖದವಳೆಂದರೆ
ಬೊಚ್ಚು ಬಾಯಿ ತೆರೆದು
ನಗುವಳು ಅವಳು ಜೋರು
ನನ್ನ ಅಜ್ಜಿಯ ರೀತಿಯೆಲೆ
ತಂಗಿಯ ಕಾರುಬಾರು!

(ವಿಶ್ವವಾಣಿ, ಲಾಲಿ ಪಾಪು ೧೨.೩.೨೦೧೭)

ಲಡ್ಡು ಮತ್ತು ಛೋಟ ಭೀಮ್

bheem-png

ಪುಟ್ಟ ನೋಡೋದು ಒಂದೆ ಕಾರ್ಟೂನು
ಛೋಟಾ ಭೀಮ್ ಗೆ ಇವ ದೊಡ್ಡ ಫ಼್ಯಾನು
ಟೀವಿ ಮುಂದೆ ಕುಳಿತು ರಿಮೋಟು ಹಿಡಿದ್ರೆ
ನಗು ಚಪ್ಪಾಳೆ ಮತ್ತೆ ಬರೋಲ್ಲ ನಿದ್ರೆ

ಕಣ್ಬಿಟ್ಟು ನೋಡ್ತಾನೆ ಭೀಮ್ ನ ಆಟ
ತುಂಬಾನೆ ಮೆಚ್ತಾನೆ ಅವನೋಡೊ ಓಟ
ಗೆಳೆಯರ ಜೊತೆಗೆ ಭೀಮ್ ನ ಒಡನಾಟ
ಶತ್ರು ಮೇಲೆ ಮಾತ್ರ ಭಾರಿ ಹೊಡೆದಾಟ

ಆದ್ರೂನು ಪುಟ್ಟಂಗೆ ಆಶ್ಚರ್ಯ ಒಂದೆ
ಭೀಮ್ ತುಂಬಾನೆ ಲಡ್ಡು ತಿಂತಾನೆ
ಲಡ್ಡುನಿಂದ ಹೇಗೆ ಶಕ್ತಿ ಬರ್ಬಹುದು
ಅನುಮಾನ ಅವ್ನಿಗೆ ಹೇಗೆ ನಂಬೋದು

ಹೊಟ್ಟೆಗೆ ಈ ಲಡ್ಡು ಅಪಾಯ ಗೊತ್ತ
ಹಲ್ಲು ಕೂಡ ಹಾಳು ತಿನ್ಬಾರ್ದು ನಿತ್ಯ
ಡಾಕ್ಟರ್ ಪುಟ್ಟಂಗೆ ಹೇಳಿದ್ದು ಸತ್ಯ
ತಿಳಿಸ್ಬೇಕು ಬೇಗನೆ ಭೀಮಂಗೆ ವಿಷ್ಯ

ಸಿಕ್ಕಿದ್ರೆ ಒಂದ್ಸಲ ಆ ಛೋಟ ಭೀಮು
ಡಾಕ್ಟರ್ ಹತ್ರ ಬುದ್ಧಿ ಹೇಳಿಸ್ಲೆ ಬೇಕು
ಲಡ್ಡು ಬಿಟ್ಟು ಬರಿ ಹಣ್ಣುತರಕಾರಿ
ತಿಂದ್ರೆ ಬೆಳೀತಿದ್ದ ಅವನು ಎತ್ರಕ್ಕೆ ಭಾರಿ

(ವಿಶ್ವವಾಣಿ-ವಿರಾಮ-ಲಾಲಿ ಪಾಪು ದಿ.೦೫.೦೨.೨೦೧೭)

ಮಿಸ್ಟರ್ ಬೀನ್

vv-png

 

ಮಿಸ್ಟರ್ ಬೀನನ್ನು
ನೋಡಿದ್ದೀರೇನು
ಕೈ ಕಾಲು ಸಣ್ಣ
ದೊಡ್ಡ ಮೂಗಣ್ಣ
ಪಿಳಿ ಪಿಳಿ ಕಣ್ಣಲ್ಲೆ
ನಗಿಸುವ ಜಾಣ

ಬಿಡೋಲ್ಲ ಬಾಯಿ
ಬಿಟ್ರೆ ಬೊಂಬಾಯಿ
ನೋಡಿದ್ದೆಲ್ಲ ಬೇಕು
ಹಣ ಉಳಿಯ ಬೇಕು
ಶಿಸ್ತಲ್ಲಿ ಸಿಪಾಯಿ
ಪೆದ್ದು ಬಡಪಾಯಿ

ಜಿಪುಣಾಂದ್ರೆ ಜಿಪುಣ
ಉಳಿಸುತ್ತಾನೆ ಹಣ
ಎಲ್ಲರಿಗಿಂತ ತಾನೆ
ದೊಡ್ಡವನಂತಾನೆ
ಚಿಕ್ಕವರ ಹತ್ರಾನೆ
ಸೋತುಹೋಗ್ತಾನೆ

ಆದ್ರೂನು ಬೀನು
ನಮ್ಗೆಲ್ಲ ಇಷ್ಟ
ಅವನಲ್ಲ ದುಷ್ಟ
ಪಡ್ತಾನೆ ಕಷ್ಟ
ನಗಿಸೋದ್ರಲ್ಲಿ  ಎಂದೂ
ಅವ್ನು ಸದಾ ಮುಂದು

(ವಿಶ್ವವಾಣಿ ಲಾಲಿಪಾಪು ದಿ.೨೫.೧೨.೧೬)