ನಾಲ್ಕು ಹೆಜ್ಜೆ

last-procession

ನೆನಪು ಇಲ್ಲದ್ದು
ಮೊದಲ ಹೆಜ್ಜೆಯಲ್ಲೆ ಬಿದ್ದು
ಅಮ್ಮನ ಮುದ್ದಿಗೆ ಅತ್ತದ್ದು
ನಾಲ್ಕು ಹೆಜ್ಜೆ ಇಟ್ಟು
ಚಪ್ಪಾಳೆ ತಟ್ಟುವ
ಅವಳ ಮುಟ್ಟಿ ನಕ್ಕದ್ದು
ಓಡುವ ಧಾವಂತದಲ್ಲಿ
ಹೊಸಿಲೆಡವಿ ಹಲ್ಲು ಮುರಿದದ್ದು
ಅವಳು ಅತ್ತು ಧಾರೆಯಾದದ್ದು
ನೋವೆಲ್ಲಿ ಎಂದು ವಿಲವಿಲಸಿದ್ದು

ಅಸ್ಪಷ್ಟ ನೆನಪು
ನಾನು ಹಠದ
ಉದ್ಧಟನಾಗುತ್ತಿದ್ದದ್ದು
ರಗಳೆಯ ರಾಗ ಎಳೆದು
ದೂರುಗಳ ಹೊತ್ತು
ಮನೆವರೆಗೂ ತರುತ್ತಿದ್ದದ್ದು
ಅಮ್ಮನ ರಕ್ಷಣೆಯಲ್ಲಿ ಹೊಸ
ಹಕ್ಕುಗಳ ಸ್ಥಾಪಿಸುತ್ತಿದ್ದದ್ದು
ಲೆಕ್ಕವಿಲ್ಲದಷ್ಟು ಸೊಕ್ಕುಗಳ ಕಟ್ಟುಗಳು

ಇಟ್ಟ ಎಲ್ಲ ಹೆಜ್ಜೆಗಳಲ್ಲು
ಅಮ್ಮ ತಿಳಿಸಿಕೊಟ್ಟ
ಅಲಿಖಿತ ಪಠ್ಯದ ಪಾಠ
ಮಾತುಗಳಲ್ಲಿ ಅವಳ ಛಾಯೆ
ಗೆಲುವುಗಳಲ್ಲಿ ಅವಳ ಛಲ
ಉಳಿಯಿಲ್ಲದ ಕೆತ್ತನೆ ನಾನು
ನನ್ನೆಲ್ಲ ಹೆಜ್ಜೆಗಳಲ್ಲಿಅವಳ ಎಚ್ಚರ
ಗುರಿ ಗೆಲವು ಗೆಲುವು

ಉರುಳಿದ ವರ್ಷಗಳ ಮೊತ್ತದಲ್ಲಿ
ಎಲ್ಲ ದೃಷ್ಟಿಗರ ಶಿಲ್ಪವಾಗಿದ್ದೇನೆ
ಆಕಾಶದೆತ್ತರ ಬೆಳೆವ ಹುಮ್ಮಸಿ
ಗೆಳೆಯ ಗೆಳತಿಯರ ಕೇಂದ್ರ ಬಿಂದು
ಕೈಬೀಸಿ ಕರೆವ ಉದ್ಯಮಿಗಳ ಕಣ್ಮಣಿ
ಕಾಂಚಣದ ಗಣಿ, ಗಟ್ಟಿ ಹೆಜ್ಜೆ
ಜಟ್ಟಿ ಬಾಹುಗಳ ಅಸೀಮ
ವಸಾಹತುಗಾರ ನಾನು

ಹೆದ್ದಾರಿಯಲ್ಲೇ ಗಮನವಿಟ್ಟವನು
ಕಳೆದ ದಾರಿಗೆ ತಿರುಗಿಲ್ಲ
ಅಲ್ಲಿ ಹತ್ತು ಹೆಜ್ಜೆಯೂ
ಅಮ್ಮನೊಡನಿಟ್ಟು
ಅವಳಾಸೆಯ ಕೂಸಾಗಲಿಲ್ಲ

ನನ್ನ ಗಟ್ಟಿ ಉಸಿರ ಸಮಯ
ಅವಳು ಕ್ಷೀಣ ದೇಹಿ
ಅಚೇತನ ಆವರಿಸಿದವಳಿಗೆ ಉಪಚರಿಸಲಿಲ್ಲ
ಧೈರ್ಯ ಅವಳೆದೆಗೆ ತುಂಬಲಿಲ್ಲ
ಅವಳ ಕನಸ ಕೊನರಿಸಲಿಲ್ಲ
ನಾಲ್ಕು ಹೆಜ್ಜೆ ಅವಳೊಡನೆ ಇಡಲಿಲ್ಲ

ಕೊನೆಗೂ
ನನ್ನ ಕೊರಗಿಗೆ ಸಮಾಪ್ತಿ ಹಾಡಿಯೇ
ಬಿಟ್ಟ ಅಮ್ಮ ಹೆಜ್ಜೆಯೂರಿಸಿದಳು
ಮಡಕೆಯಲ್ಲಿ ಕೆಂಡ
ಹೊಗೆಯೊಡನೆ ಅವಳ ಕಳೇಬರ
ಮುಂದೆ ನನ್ನ ಹೆಜ್ಜೆ ಅವಳೊಟ್ಟಿಗೆ
ಹೊತ್ತು ಬರುವ ಎಂಟು ಕಾಲು
ಘಟಕ್ಕೆ ಸಿದ್ದವಾದ ನನ್ನ ಹೆಗಲು

(ಚಿತ್ರ:ಅಂತರ್ಜಾಲದಿಂದ)

(‘ಸುರಹೊನ್ನೆ’ ಇ ಪತ್ರಿಕೆಯಲ್ಲಿ ಪ್ರಕಟಿತ http://surahonne.com/?p=13417)

ಕೃತಘ್ನನ ಕೂಗು

eat1

ಹೆತ್ತವ್ವ ಹೆಚ್ಚು ನೆನಪಾಗಳು
ಅಪ್ಪ ಮರವೆಯೆಂಬಲ್ಲಿ ಲುಪ್ತ
ಅಕ್ಕ ಅಣ್ಣ ತಮ್ಮ ತಂಗಿಯರೆಲ್ಲ
ಚಿತ್ತದಲ್ಲಿ ನಿರ್ಭಾವ ಸಂಗಿಗಳು
ಬಾಂಧವರಂತೆಯೇ ಸ್ನೇಹಿತರೂ ಹಿತ ಶತ್ರುಗಳು !

ಹಸುರಿನೆಲೆಗಳ ತರಿದು
ಹಣ್ಣ ಮರಗಳ ಕಡಿದು
ಅಗಿದುಗಿದು ಫಸಲಿಗೆ ಮುನ್ನ
ಜೀರ್ಣೋಭವವಾಗಿಸಿ
ಪಂಚ ಭೂತಗಳಲ್ಲೂ
ವಾಕರಿಸಿ ಕೇಳಿಸಿದ್ದೇನೆ
ನನ್ನ ತೆವಲಿನ ಕೇಳಿ, ನರ್ತನದ ನುಲಿ

ಪುಟ್ಟ ಕುಕ್ಕುಟದೊಂದಿಗೆ ಆಟ
ಮರಿ ಕುರಿಯೊಟ್ಟಿಗೆ ಮುದ್ದಾಟ
ಆಡಿನೊಂದಿಗೆ ಆಮೋದ
ಈಜುವ ಮೀನಿಗೆ ಆಸೆ…
ಬಲಿತ ಅವೆಲ್ಲವುಗಳ ಬಲಿಕೊಟ್ಟು
ನಾಲಿಗೆ ಚಪಲಕ್ಕೆ ಹೊಟ್ಟೆ ತಣಿವಿಗೆ
ಕಂಠ ಜಠರ ಕೈಕಾಲು ಸೀಳಿ ಬೆಂಕಿಗಿಟ್ಟು
ತಾಟಿನಿಂದ ಚಪ್ಪರಿಸಿ ತೇಗಿದ್ದೂ
ನಾನೆ ದೀರ್ಘ- ಕಾಲದವರೆಗೂ
ಉದಹರಿಸಲು, ಬೆದರಿಸಲು ಹೆಕ್ಕಿ ಕುಕ್ಕಿದ್ದೇನೆ
ಬಡತನವೆಂಬ ಅಳಲು; ಧರ್ಮವೆಂಬ ಬಿಳಲು
ನನ್ನಿಚ್ಛೆಯ ಆಹಾರದ ಹಕ್ಕು ಯಾರಿಲ್ಲ ಕೀಳಲು!

ಇನ್ನೂ ಸುತ್ತಲೂ ಉಳಿದಿದ್ದಾವೆ
ಹಸಿರು ಚಾಚಿದ, ನಾಲಗೆಗೆ ಮುಟ್ಟಿಸದ
ಗಿಡ ಮರ ಬಳ್ಳಿ ಹೂ ಹಣ್ಣು ಕಾಯಿ
ಗಿರಕಿಯ ಸತಿ ಸುತ ಸ್ನೇಹಿ ಕೃತಜ್ಞ ನಾಯಿ
ಕಾಣದ ಕೋಗಿಲೆ, ಹಾರುವ ರಣ ಹದ್ದು!

ದಯವೇ ಇರುವ ಧರ್ಮಗಳ ಪ್ರವಚನಕ್ಕೆ
ಸಜ್ಜಾದ ನಾಲಿಗೆ; ಖೊಳ್ಳನೆ ನಗುವ ಬುದ್ಧಿ
ನಾಚಿಕೆಗೇಡರಿಯದ ಮನಸ್ಸು ನನ್ನ ಧನಸ್ಸು!

ಕಟ್ಟಿ ಬೆಳೆಸಿದ ಕಾಯ ದೃಢತೆ
ಕಳೆದುಹೋಗುವ ಭಯ ಕಾಡುವಾಗಲೆ
ಹೆಕ್ಕಬೇಕು ಸೇವಾ ವೈದ್ಯರ
ಎದೆಗೆ ಅಮ್ಲಜನಕದ ಕೊರತೆ ನೀಗಿ
ಧಮನಿಗಳಲ್ಲಿ ರಕ್ತ ಓತಪ್ರೋತ ತುಂಬಿ
ಹರಿಸುವವರ ಸೆಳೆದು ನಾನುಳಿಯಬೇಕು

ನಿಮ್ಮ ಕರುಳ ಹಿಂಡುವಂಥ
ನನ್ನ ಕೂಗು ಕೇಳಿ ಅಜ್ಞರೆ!
ಕರುಣೆ ಹರಿಸಿ ಉಳಿಸಿ ಈ ಕೃತಘ್ನನ ನಾಲಿಗೆ
ಜಠರಕ್ಕಂಟಿದ ಮಾಳಿಗೆ
ಸುರಿಯಿರಿ ಆಜ್ಯ ದುರಾಸೆಗಂಟಿದ ಬಾಳಿಗೆ

(ಚಿತ್ರ:ಅಂತರ್ಜಾಲ)