ಜಗ ವಂದ್ಯ

 

pexels-photo-289358

’ಅವನು’
ದಿಕ್ಕು ಬದಲಿಸುವಾಗ
ಬದಲಿಸಿ ಸಾಗುತ್ತಲೇ ಇರುವಾಗ
ಹೆದರದಿದ್ದೀತೆ ಜಗ!

ದಕ್ಷಿಣವನು ಮುಟ್ಟಿದಾಗ
ಮುಂದೆ ಸಾಗಿಬಿಟ್ಟಾನೆಂಬ
ಭಯದುದ್ವೇಗ!

ಮುಂದೇನು?
ಅಂತ್ಯವಾದರೆ ಯುಗ!

ಅವನು
ಅವನಿಯ ನಲ್ಲ
ಬಿಡಲೊಲ್ಲ!

ಜಾಡ ಹಿಡಿದ
ಹಿಂತಿರುಗಿದ
ಹಿಮ ಕರಗಿಸುತ್ತ
ಮೋರೆ ಬೆಳಗಿಸುತ್ತ

ಅದೇ ಸಂಕ್ರಮಣ
ಪಥ ಬಿಡದ ಚಲಿತ
ಜನ ಹಿತನು
ಜಗ ಹೃದಯನು
ಮಿಗಿಲ ವಂದ್ಯನು
ಸಂಕ್ರಾಂತಿ ಪುರುಷನು

(Pic courtesy: Pixel)

Advertisements

ಮುಚ್ಚಿದ ಬೊಗಸೆ

new-years-eve-585922_960_720

ಎರಡು
’ಸಾವಿರದ’
‘ಹದಿ-ನೆಂಟೆ’
ಸುರಿದು ಸುಖ ದು:ಖ
ನಿರ್ಲಿಪ್ತ ಸರಿ-ದೆ …..

ಇದೀಗ
ಎರಡು ಸಾವಿರದ
ಹತ್ತೊಂಭತ್ತು –
ತೆರೆ ಸರಿಸಿ
ಮುಚ್ಚಿದ ಬೊಗಸೆ …..

ಬಾ ಹೊಸತೆ
ಕೊಡು
ಭರವಸೆಯ ಬತ್ತಳಿಕೆ
ನೀಡು
ಆಸೆಗಳಿಗಾಸರೆ
ಹೂಡು ಭಾಗ್ಯ
ಗುರಿಯಿಡು
ನೊಂದವರ
ಬದುಕ ಬಾಗಿಲಿಗೆ
ಈಡಾಡು ಬೆಳಕೆ …..

ಮುಗಿಬೀಳಲಿ
ಮಿಗಿಲಿಲ್ಲದ ಹರ್ಷ
ಅದಕ್ಕಿರಲಿ ಗುರಿ
ಮುಗಿಲೆ!

(ಚಿತ್ರ ಕೃಪೆ:Pixabay)

ಫ್ರೀಜರಿನಲ್ಲಿ ನೆನಪು

photo-1545459146-84ce459e31b0

ಆ ಸಣ್ಣ ಗಲ್ಲಿಯ ತಿರುವಿನ
ಕತ್ತಲ ಮೂಲೆಯಲ್ಲಿ
ನಾಳೆ ಸಿಕ್ಕುವೆನೆಂದು ಪಿಸುಗುಟ್ಟಿ
ನೀನು ಓಡಿಹೋದ ’ನೆನಪು’
ಎದೆಯ ಫ಼್ರೀಜರಿನಲ್ಲಿಟ್ಟು
ಕಾಲಾಂತರವಾಗಿದೆ

ಜೀವನ ತಿರುವಿನಲ್ಲಿ ಇಬ್ಬರೂ
ಒಬ್ಬರಿಗೊಬ್ಬರು
ಕಳೆದುಹೋದರೂ
ಫ಼್ರೀಜರಿನಲ್ಲಿ ’ನೆನಪು’
ಇಂದಿಗೂ ತಾಜಾ ಉಳಿದಿದೆ
ಗಂಧ ತೊರೆಯದೆ

(ಚಿತ್ರ ಕೃಪೆ: Unsplash)

ತಾಯಿಯರು ಮತ್ತು ತವರು

aditya-siva-212526-unsplash

ಊರಿದ ಊರಿಂದ ವಾಹನವೇರಿ
ಉದ್ದಕ್ಕೂ ಹರಿದ ಹಿರಿದಾರಿ ಮುಗಿಸಿ
ನಡಿಗೆಯಲಿ ಕಿರು ಹಾದಿಯಲಿ ಸರಸರ
ಅಂಕುಡೊಂಕ ಕೆಲ ದೂರ ಸವೆಸಿ
ಉಸ್ಸೆಂದು ನಿರಾಳ ನಿಂತಲ್ಲಿ ಕಾಲು
ಕಾಣುವುದು ಆ ಹಳೆಯ ಹಳ್ಳಿ ಸೂರು!

ದಾರಿಯುದ್ದಕೂ
ಅಲ್ಲಿ ಇದ್ದೀತೊ ಇಲ್ಲವೋ ಭಾರೀ ಗುಡ್ಡ
ಸಣ್ಣ ದರಿ ಝರಿ ತೊರೆ ಕೆರೆ ಹೊಳೆ
ಹಸಿರ ಗಿಡ ; ಮೈತಾಗಿ ನಗಿಸುವ ಗಿಡಗೆಂಟೆ
ಬದು-ಭತ್ತ ತೂಗುತೆಂಗು
ತೆನೆರಾಗಿ ಗೊನೆಬಾಳೆ
ಸಾಗಿ ಕಾಲು ದಾರಿ ಮುಗಿಸೆ ಕಂಡೀತು
ಹೊಸತೆಂದೋ ಆಗಿದ್ದ ಒಕ್ಕಲು
ಅದು ಮೂಡು ಯಾ ಪಡುವಣ
ತೆಂಕು ಯಾ ಬಡಗ ಮನೆ
ಗೂಡು ಹಕ್ಕಿಗಳರಮನೆ
ಹಳೆನೆನಪಿಗೆ ಹೊಸತಾಗುವ
ತೂಗು ಉಯ್ಯಾಲೆ ಮೇನೆ!

ಅದು ಅಮ್ಮನಾ ತವರು
ಅವಳ ಅಕ್ಕತಂಗಿ ಅಣ್ಣತಮ್ಮರು
ನೆಲಮುಟ್ಟಿ ಉಸಿರ ಹಚ್ಚಿದಾ ಮನೆ
ಸಣ್ಣ ದೇಹಗಳು ಬೆಳೆದ ಸಿರಿಮನೆ
ನಿಲುಕದ ಕನಸುಗಳಲ್ಲಿ ಸಂಭ್ರಮಿಸಿದ
ಜೀವಗಳ ಹೊನ್ನ ಮನೆ

ಕೇಳಬಹುದು ಕೆಲವರು
ಅಲ್ಲೇನು ಅಂಥ ಆಟವುಂಟೆ?
ಚೆಂಡೆ ಮದ್ದಳೆ ಯಕ್ಷರ ಆಟವುಂಟೆ?
ಬೆಳ್ಳಿತಟ್ಟೆಯಲ್ಲಿ ಬಡಿಸಿದ ಪಾಯಸವುಂಟೆ?
ಗಂಟೆ ಜಾಗಟೆಗಳಲ್ಲಿ ನಲಿವ ದೇವರುಂಟೆ?
ದೈವವುಂಟೆ?

ಕಣ್ಣು ಕಿವಿ ಹೃದಯ ಹದ ಮಾಡಿದರೆ
ಕೇಳೀತು ವೈನಾಗಿ ಹರಿವ ಹೊಳೆಯ ರಾಗ
ದನ ಕರು ಮಹಿಷಿಗಳ ದೊಡ್ಡ ಕಣ್ಣ ಸೊಗ
ಪ್ರೀತಿ ಹರಿಸುವ ಶ್ವಾನ ; ಪುಳಕ ಮಾರ್ಜಾಲ
ಎದುರುಗೊಂಡಪ್ಪಿಕೊಳ್ಳುವ ಬಂಧಗಳ
ಎಲ್ಲೆಮೀರಿದ ಭಾವ

ಸಾರಿಸಿದ ಸಗಣಿ ನೆಲ; ಸಾವರಿಸಿ ಕುಳಿತ
ತುತ್ತುಣಿಸಿ ದಣಿಯದೆ ಹಾಡಿದ
ಸುಕ್ಕು ಸಿರಿಮೊಗದ ಹಿರಿ ಜೀವ
ಕೇಳುತ್ತಾ ಚಿಗುರುಗಳು ಗಟ್ಟಿ ತೊಲೆಗೆ ಬಣ್ಣ
ಸೀರೆಯ ಜೋಳಿ ಹಚ್ಚಿ ಜೀಕುವ ಕಲರವ…

ಅಲ್ಲಿ ಎಲ್ಲ ಆಟಗಳ ದೇವರುಂಟು
ಸುಖದು:ಖಗಳ ಪಾಠಗಳುಂಟು
ಬೆಸೆವ ನಂಟಿನ ಅಂಟು ಉಂಟು
ಕೊಂಕಿಲ್ಲದ ನಗೆ; ಕುಟಿಲವಿಲ್ಲದ ಮಾತು
ಕೊಂಡಾಟ ಮತ್ತು ತುಂಟಾಟವುಂಟು

ಅಮ್ಮ ನಕ್ಕುನಲಿದು ಹಗುರಾಗಿ ಹಾರಿ
ಮನಸ ಹದದಲ್ಲಿ ಹೂ ಬಳ್ಳಿ ನೆಟ್ಟು
ಖುಷಿಯ ಕೃಷಿಕಳಾಗುವಳು ಕೆಲ ಹೊತ್ತು!

ಹೊರಡುತ್ತಾ, ಕಣ್ಣಲ್ಲಿ ತುಂಬಿ ಅಮೃತ ಬಿಂದು
ಭಾರ ಎಳೆವ ತೇರಾಗುವಳು
ಉಮ್ಮಳಿಸುವ ಭಾವ ಸಣ್ಣ ಪೆಟ್ಟಿಗೆಯಲ್ಲಿಟ್ಟು
ಬೀಗವಿಕ್ಕಿ ಮತ್ತೊಂದು ಚಿಕ್ಕ ಚೀಲದ ಭರ್ತಿ
ನೆನಪ ತಿನಿಸುಗಳ ಹೊತ್ತು ಸಾಗುವಳು
ಅದೇ ಕಾಲು ದಾರಿ ಮುಟ್ಟೆ ಹೆದ್ಡಾರಿ
ತುಡಿತದೂರಿಂದ ತಿರುಗಿ ಸೇರೆ ದುಡಿತದೂರು

(Pic courtesy: Unsplash)

ದೀಪಾವಳಿಗೆ

photo-1514377863868-02d7217c8bcd

ಜಲವ ತುಂಬಿ
ಜಳಕ ಮುಗಿಸಿ
ಅಂಬುಜೆಗೆ ಪೂಜೆ
ಮತ್ತೆ ಜೊನ್ನ ಆರತಿ

ಬಲಿಯ ಕರೆದು
ಬಲುಮೆ ಮೆರೆದು
ಭಕ್ತಿ ಬತ್ತಿ ಹೊಸೆದು
ಸ್ಮರಣೆ ತೈಲ ಎರೆದು
ದೀಪ ಹಚ್ಚಿ ಹೊಳೆದು
ತಮದ ದಾರಿ ತೊರೆದು
ಬೆಸೆವ ಬೆಳಗೆ
ಜ್ಞಾನ ದೀವಿಗೆ

(Pic courtesy: Unsplash)

ಇಂದೊಂದು ದಿನ

MKG

ಇಂದೊಂದು ದಿನ
ಗಾಂಧಿಯ ನೆನೆಯೋಣ
ಹೃದಯ ಹಣತೆಯ ಹಚ್ಚೋಣ
ಪಲ್ಲಕ್ಕಿ, ಹಣ, ಪಣ ಪಠಣ ನಿಲ್ಲಿಸೋಣ

ಅರೆಬೆತ್ತಲೆಗೆ ನಮಿಸೋಣ
ಗರಿಗರಿ ದಿರಿಸು ಧರಿಸುವ
ಪರಮಾಪ್ತ ಶಿಷ್ಯನಾಗುವ ಆಸೆ
ನಾಳೆವರೆಗಾದರೂ ಸರಿಸೋಣ!

ಅವನ ದಂಡಕ್ಕೆ ನಮನ
ಅಧಿಕಾರ ದಂಡ ದಾಹವನ್ನ
ನಾಳೆ ಸಂಚಲ್ಲಿ ಇಂಗಿಸಿಕೊಳ್ಳೋಣ!

ಅಹಿಂಸೆಯ ಪಾಠ ಹೇಳೋಣ
’ಕಂಸ’ದೊಳಗೆರೆಯಲ್ಲಿ ಕಾದು
ನಾಳೆ ಪರಿಪಾಠಕ್ಕೇ ತಿರುಗೋಣ!

ಇಂದೊಂದು ದಿನ ಗೋಣಾಡಿಸೋಣ
ಅವನ ನಡೆ ನುಡಿ ದುಡಿತ ತುಡಿತಗಳ
‘ಮೆಚ್ಚಿ ಅಹುದಹುದು’ ಅನ್ನೋಣ
ನಾಳೆ ಮಾಡೋಣ ಇಂದಿನೆಲ್ಲದರ ದಹನ!

ಹಳೆ ಬಾಸು ಭೇಟಿ

pexels-photo-1300527

ಅಂದಿನಾಫ಼ೀಸಿನ ತರಲೆ
ಬಾಸು ತನ್ನ ಛೇಂಬರಿನಲ್ಲಿ
ಗಹನವಾಗಿ ಯೋಚಿಸುತ್ತಾ
ಒಂದರಮೇಲೊಂದು ಸಿಗರೇಟು
ದಹಿಸುತ್ತಾ ಹೊಗೆ ಮೋಡ ಸೃಷ್ಟಿಸಿ
ತಿರುಗುವ ಕುರ್ಚಿ ಗರಗರ
ತಲೆಯೊಳಗೂ ತಿರುಗಿಸಿ
ಸ್ಟೆನೋಳ ಕರೆದು ಏನೇನೋ ಬಯ್ದು
ಶೀಘ್ರಲಿಪಿಸಿ…
ಹೊರ ಹೋಗುವಾಗ ಅವಳ ಸೀರೆ
ನೆರಿಗೆ ತುಂಬಾ ತಂಬಾಕು ಸುಟ್ಟ ಘಾಟು
ಅವಳಿಗದು ಇಷ್ಟವೋ
ಅವನು ಅನಿಷ್ಟವೋ
ತಿಳಿಯದೆ ಹರಿದದ್ದು ಮಾತ್ರ
ಅವಳ ಕಣ್ಣಂಚಲ್ಲಿ ತುಂಬಿದ್ದ ನೀರು…

ಇಂದಿನಾಫ಼ೀಸು ಅದೇ
ಅವಳೇ ಈಗ ಅಲ್ಲೆ ಬಾಸು!
ಇನ್ನು ನಾಲ್ಕೇ ವರ್ಷ ಅವಳಿಗುಳಿದ ಸರ್ವೀಸು

ಅದೇ ಛೇಂಬರು
ಅಲ್ಲಿ ಕಾಯುತ್ತಿರುವುದು ಹಳಬರೊಬ್ಬರು
ಬಾಸಿಣಿಯನ್ನು ಭೇಟಿಸಲು
ಅವರದು ಪಿಂಚಣಿಯದು
ಮುಗಿಯದೇ ಉಳಿದ ಇರಿಸುಮುರಿಸು ತಕರಾರು

ಚೀಟಿ ನೋಡಿ ಬಾಸಿಣಿ ಲಗುಬಗೆ
ಹೊರಬಂದು ನಮಸ್ಕರಿಸಿ ’ಒಳಬನ್ನಿ’
ಕರೆದು ಕೂರಿಸಿ ತಾನು ನಿಂತು ಅದೇ ಭಂಗಿ
ಹಳೆಬಾಸಿನಹವಾಲು
ಸ್ವೀಕರಿಸುತ್ತಾ ’ಅಂದಿನಂತೆಯೇ’
’ಸರ್.. ಸರ್..’
ಬರೆದುಕೊಳ್ಳುತ್ತಾ ತಲೆಯಾಡಿಸುತ್ತಾ…

ಇದೀಗ ನಿರಾಳ ಜೊತೆಗೆ ನಿಟ್ಟುಸಿರು
ತಿರುಗುವ ತಂಪು ಫ಼್ಯಾನು ಅಲ್ಲೀಗ ಗಂಧ
ಪರಿಮಳ ಹಳೆಬಾಸ ಕೋಟು ತುಂಬಾ!
ಹಳಬರು ಅವಳೆದುರು ಕಣ್ಣರಳಿಸಿ
ಅಳೆದಳೆದರು ಮತ್ತು
ಹರಿಸಿದರು ಯಾಕೋ ಕಣ್ಣೀರು….